Тожикистон Ўзбекистонга электр энергиясини етказиб беришни тиклади, деб хабар бермоқда Asia-Plus ҳукуматнинг энергия блокидаги манбаларига таяниб.
Қайд этилишича, Тожикистон электр энергиясини Ўзбекистонга етказиб бериш оз ҳажмда ва фақат 220 киловольтли иккита электр узатиш тармоғи орқали амалга оширилади «Яқин келажакда Ўзбекистонга электр энергияси етказиб бериш сезиларли даражада оширилади ва 500 киловольтли электр узатиш тармоқлари жалб қилинади», — дейилади хабарда.
Унинг айтишича, ҳозирча мамлакатлар Ўзбекистонга етказиб берилувчи Тожикистон электр энергиясининг нархи бўйича якуний келишувга эришмаган.
Икки мамлакат бош вазирлари Коҳир Расулзода ва Абдулла Арипов раис ҳисобланувчи Тожикистон ва Ўзбекистон ўртасидаги савдо-иқтисодий ҳамкорлик бўйича ҳукуматлараро комиссиянинг март ойида бўлиб ўтган мажлисида Тожикистоннинг Ўзбекистонга электр энергияси етказиб бериш ҳажми навбатдаги мажлисда келишиб олинишини маълум қилинганди.
Эслатиб ўтамиз,Тожикистон совуқ об-ҳаво бошлангани ва республиканинг ички эҳтиёжларини таъминлаш мақсадида Ўзбекистонга электр энергияси экспорт қилишни ўтган йилнинг декабрь ойида тўхтатган эди.
Аввалги эришилган келишувга кўра, Душанбе электр энергиясини Тошкентга фақат апрель ойидан октябргача, яъни Тожикистоннинг ички эҳтиёжлари тўлиқ қондирилганидан кейингина экспорт қилади.
Президент Шавкат Мирзиёев 4 май куни ёқилғи-энергетика тармоғида самарадорликни ошириш, энергия сарфини оптималлаштириш масалалари юзасидан ўтказган йиғилишда Ўзбекистонда минг долларлик ялпи ички маҳсулот яратиш учун ривожланган давлатларга нисбатан 2-3 баробар кўп энергия сарфланиши, шу боис яқин йилларда энергия сарфини 2-2,5 баробарга қисқартириш масалалари муҳокама қилинган эди.
Изоҳ (0)