Koronavirus pandemiyasi tufayli yuzaga kelgan hozirgi sinovli kunlarda O‘zbekiston Respublikasi Prezidenti tashabbusi bilan tashkil etilgan “Saxovat va ko‘mak” umumxalq harakati mamlakat aholisi tomonidan katta xayrixohlik bilan qarshi olindi.
Davlat xavfsizlik xizmati xodimlari ham ushbu xayrli ishga o‘zlarining munosib hissasini qo‘shdi.
Jumladan, DXX idoralarida faoliyat olib borgan 53 nafar boquvchisini yo‘qotgan yoki yolg‘iz yashayotgan faxriylarga, nogiron va halok bo‘lgan harbiy xizmatchilarining yaqinlariga, shuningdek, respublikamiz bo‘ylab 913 ta yordamga muhtoj oilalarga jami 329 million so‘mlik moddiy yordam ko‘rsatildi.
Avvalroq Andijon IIB “Saxovat va ko‘mak” jamg‘armasiga 101 million so‘m xayriya qilgani, Toshkent viloyati IIBB Probatsiya bo‘limi tomonidan “Saxovat va ko‘mak” umumxalq harakati doirasida ichki ishlar organlari nazoratida bo‘lgan 150 ga yaqin shaxsga ijtimoiy ko‘mak ko‘rsatilgani xabar berilgan edi.
Ma’lumot uchun, “Saxovat va ko‘mak” umumxalq harakati hozirgi og‘ir paytda aholining yordam va ko‘makka muhtoj qatlamlarini aniq, manzilli asosda qo‘llab-quvvatlash maqsadida tashkil etilgan. Shavkat Mirziyoyev ushbu umumxalq harakati O‘zbekiston yangi tarixi sahifalaridan mustahkam o‘rin olishini ta’kidlagan edi.
Prezident tashabbusiga ko‘ra, pandemiya sharoitida ehtiyojmand fuqarolarga va oilalarga yordam bergan korxonalar va tadbirkorlarga davlat tomonidan bir qator imtiyozlar va preferensiyalar beriladi.
Izoh (0)