Қашқадарё вилоятида жарима майдони қоровулига босим ўтказиб, танишининг машинасини ноқонуний олиб чиқишга уринган терговчига чора кўрилди. Бу ҳақда вилоят ИИБ ахборот хизмати маълум қилди.
Жорий йил 2 май куни ижтимоий тармоқларда «Оёғи ердан узилган терговчи» сарлавҳали видеотасвир пайдо бўлди.
Маълум бўлишича, мазкур тасвир Китоб туманида суратга олинган.
Қашқадарё ИИБ ахборот хизматининг ёзишича, 2020 йил 22 апрель куни туманнинг «Бўстон» маҳалласи, Абдулла Қодирий кўчасида яшовчи Р.Каримов Ўзбекистон Республикаси Ўз хавфсизлиги бошқармасининг Қашқадарё вилояти бўлими бошлиғига ариза билан мурожаат қилиб, жарима майдонида қоровул бўлиб ишлашини, туман ИИБ терговчиси унга босим ўтказиб, ҳақорат қилган ҳолда танишига тегишли машинани ноқонуний олиб чиққанлигини билдирган.
Аниқлик киритилишича, ЙПХ инспекторлари карантин қоидасини бузган ҳайдовчига тегишли Nexia’ни тумандаги «Коммунал фойдаланиш бошқармаси» МЧЖга қарашли жарима майдонига олиб келади. Автомобили жарима майдонига қўйилган ҳайдовчи ЙПХ инспекторлари кетгач, туман ИИБ терговчиси Алишер Муҳаммадиевга қўнғироқ қилиб, қоравулга терговчи сўраётганини айтади.
Китоб тумани ИИБ ҳузуридаги Тергов бўлинмаси бошлиғи Алишер Муҳаммадиев эса қоровулга автомашинани жарима майдонидан чиқариб юборишини айтиб, босим ўтказади. Жарима майдони қоровули терговчи гапини рад этгач, орадан беш дақиқа вақт ўтиб терговчи хизмат кийимида жарима майдонига келиб, яна уни ҳақорат қилади ва машинани чиқаришни талаб қилади.
Видеотасвирдан англашилишича, терговчининг ноқонуний талаби бажарилади.
Изоҳ (0)