Туркманистон ўз ҳудудининг санитария ҳимояси учун жуда муҳим чораларни кўрмоқда ва бошқа давлатлар сингари бу муаммога жиддий ёндашмоқда. Бу ҳақда ЖССТнинг Туркманистондаги ваколатхонаси раҳбари Паулина Карвовскага таяниб, «РИА Новости» хабар берди.
Унинг сўзларига кўра, вирус ҳақидаги дастлабки хабарлардан бошлаб Ашхобод коронавируснинг мамлакат ҳудудига кириб келишига йўл қўймаслик учун энг юқори даражада қарорлар қабул қилиш бўйича иш бошлаган, Туркманистон ҳукумати ва Соғлиқни сақлаш вазирилиги ушбу ишларини тўлиқ масъулият билан олиб бормоқда.
Карвовсканинг фикрича, Туркманистон ҳукумати томонидан мамлакатдаги БМТ тузилмалари билан ҳамкорликда ишлаб чиқилган COVID-19 коронавирус инфекциясига қарши чора-тадбирлар режаси ушбу саъй-ҳаракатларни қўллаб-қувватлайди.
«Ташриф давомида биз Туркманистон томонининг COVID-19 коронавирус инфекциясини мамлакатга кириб келишининг олдини олишга йўналтирилган чора-тадбирлари билан танишдик. Биз Туркманобод шаҳридаги карантинда бўлган одамлар, тиббиёт ходимлари, шунингдек, объект раҳбарлари билан учрашдик. Ушбу марказлар одамларни тезда даволаш ва изоляциялаш орқали, касалликнинг тарқалишига йўл қўймай муҳим рол ўйнаши мумкин», — дейди ЖССТ вакили.
Шунингдек, Карвовска ЖССТнинг Ашхободдаги ваколатхонаси мамлакатда коронавирусга боғлиқ вазиятни қандай баҳолаётгани ҳақида ҳам маълумот берган.
«Касаллик ҳолатлари аниқланса, бизни хабардор қилишлари борасида Туркманистон соғлиқни сақлаш органларига ишонамиз ва ҳозирга қадар бу каби ҳолатлар ҳақида ҳеч қандай маълумот берилмади», — дейди Карвовска.
Аввалроқ ЖССТ Россиядан Тожикистон ва Туркманистонда эпидемияга қарши курашиш борасида ёрдам сўрагани тўғрисида хабар берилган, Туркманистонда ЖССТ миссияси олдидан коронавирусга чалинган беморлар бошқа касалхоналарга яширилаётгани маълум бўлганди.
Эслатиб ўтамиз, Марказий Осиё давлатлари орасида Тожикистон ва Туркманистонда коронавирус билан касалланиш бўйича бирорта ҳам ҳолат расман эълон қилинмагани сабаб Жаҳон соғлиқни сақлаш ташкилоти экспертларидан иборат гуруҳ Тожикистон ва Туркманистонга ташриф буюриши ҳақида хабар берилганди. 2 май ҳолатига кўра, Тожикистонда коронавирусга чалинганлар сони расман 32 кишига етгани ва икки киши вафот этгани маълум қилинган.
Изоҳ (0)