Сардобадаги сув тўғонининг ёрилиши оқибатида Қозоғистоннинг Мақтаарал туманидаги яна бир аҳоли яшаш пункти — Оргебас сув остида қолди. Бу ҳақда Туркистон вилояти минтақавий коммуникация хизматига таяниб, «Kazinform» хабар берди.
3 май куни соат 05:00 да 250 хонадон сув остида қолган Фирдавсий аҳоли яшаш пунктидан сув Жанажол қишлоқ округидаги Оргебас пунктига етиб келган. Аҳоли пунктлари орасидаги масофа — 3 километр.
Соат 08:00 га келиб, бутун Оргебас аҳоли пункти сув остида қолган (194 уй).
Таъкидланишича, 1451 киши истиқомат қиладиган қишлоқ тўлиқ эвакуация қилинган. Эвакуация жараёнида ҳеч ким жароҳат олмаган.
Аввалроқ Сардоба сув омборидаги сув тошқини оқибатида Қозоғистоннинг Туркистон вилояти ҳудудида техноген хусусиятга эга фавқулодда ҳолат эълон қилингани ҳақида хабар берилганди. Маълумотларга кўра, вилоятнинг 5 мингдан ортиқ қишлоқ аҳолиси сув тошқини хавфи туфайли уйларини тарк этган. Айримлари ўзлари тарк этган бўлган бўлса, қолганларига эвакуация қилишда ёрдам берилган.
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Сув омбори тўғони бузилиб, сув тошиб чиқишига кучли ёмғир ва шамол сабаб бўлган.
Изоҳ (0)