Turkmaniston o‘z hududining sanitariya himoyasi uchun juda muhim choralarni ko‘rmoqda va boshqa davlatlar singari bu muammoga jiddiy yondashmoqda. Bu haqda JSSTning Turkmanistondagi vakolatxonasi rahbari Paulina Karvovskaga tayanib, “RIA Novosti” xabar berdi.
Uning so‘zlariga ko‘ra, virus haqidagi dastlabki xabarlardan boshlab Ashxobod koronavirusning mamlakat hududiga kirib kelishiga yo‘l qo‘ymaslik uchun eng yuqori darajada qarorlar qabul qilish bo‘yicha ish boshlagan, Turkmaniston hukumati va Sog‘liqni saqlash vaziriligi ushbu ishlarini to‘liq mas’uliyat bilan olib bormoqda.
Karvovskaning fikricha, Turkmaniston hukumati tomonidan mamlakatdagi BMT tuzilmalari bilan hamkorlikda ishlab chiqilgan COVID-19 koronavirus infeksiyasiga qarshi chora-tadbirlar rejasi ushbu sa’y-harakatlarni qo‘llab-quvvatlaydi.
“Tashrif davomida biz Turkmaniston tomonining COVID-19 koronavirus infeksiyasini mamlakatga kirib kelishining oldini olishga yo‘naltirilgan chora-tadbirlari bilan tanishdik. Biz Turkmanobod shahridagi karantinda bo‘lgan odamlar, tibbiyot xodimlari, shuningdek, obyekt rahbarlari bilan uchrashdik. Ushbu markazlar odamlarni tezda davolash va izolyatsiyalash orqali, kasallikning tarqalishiga yo‘l qo‘ymay muhim rol o‘ynashi mumkin”, — deydi JSST vakili.
Shuningdek, Karvovska JSSTning Ashxoboddagi vakolatxonasi mamlakatda koronavirusga bog‘liq vaziyatni qanday baholayotgani haqida ham ma’lumot bergan.
“Kasallik holatlari aniqlansa, bizni xabardor qilishlari borasida Turkmaniston sog‘liqni saqlash organlariga ishonamiz va hozirga qadar bu kabi holatlar haqida hech qanday ma’lumot berilmadi”, — deydi Karvovska.
Avvalroq JSST Rossiyadan Tojikiston va Turkmanistonda epidemiyaga qarshi kurashish borasida yordam so‘ragani to‘g‘risida xabar berilgan, Turkmanistonda JSST missiyasi oldidan koronavirusga chalingan bemorlar boshqa kasalxonalarga yashirilayotgani ma’lum bo‘lgandi.
Eslatib o‘tamiz, Markaziy Osiyo davlatlari orasida Tojikiston va Turkmanistonda koronavirus bilan kasallanish bo‘yicha birorta ham holat rasman e’lon qilinmagani sabab Jahon sog‘liqni saqlash tashkiloti ekspertlaridan iborat guruh Tojikiston va Turkmanistonga tashrif buyurishi haqida xabar berilgandi. 2-may holatiga ko‘ra, Tojikistonda koronavirusga chalinganlar soni rasman 32 kishiga yetgani va ikki kishi vafot etgani ma’lum qilingan.
Izoh (0)