Шимолий Кореяда ҳукмрон Меҳнат партиясининг матбуот органи бўлган Rodong Sinmun газетаси КХДР раҳбари Ким Чен Иннинг ўғит заводи очилишида тушган фотосуратларини эълон қилди. Ким Чен Ин суратларини КХДР Марказий телеграф агентлиги ҳам эълон қилган.
Фотосуратларда Шимолий Корея раҳбари соғлом кўринишда бўлиб, фотосуратчиларга табассум қилган.
Жанубий Кореянинг Yonhap агентлиги Шимолий Корея раҳбари 20 кундан бери биринчи марта жамоатчилик олдида пайдо бўлганини қайд этди. Апрель ойида CNN телеканали Ким Чен Иннинг юраги операция қилингани ва соғлиғи ёмонлашгани ҳақида хабар берганди.
Телеканалда Чен Ин сўнгги марта 11 апрель куни оммага кўриниш бергани, шунингдек, у Ким Ир Сен туғилганига 108 йил тўлиши муносабати билан 15 апрелдаги маросимни ўтказиб юборгани таъкидланган. Япониянинг Shukan Gendai нашри у операциядан кейин оғир аҳволда эканини ёзган.
Мавзуга доир: «Асабийлашганидан шифокорнинг қўллари қалтирар эди». Ким Чен Инда ўтказилган жарроҳлик тафсилотлари маълум қилинди
25 апрель куни кечаси Хитойнинг Weibo ижтимоий тармоғида Гонконгнинг HKSTV телевидениеси директори ўринбосари номидан Ким Чен Иннинг ўлгани ҳақидаги хабар пайдо бўлган. Аммо КХДРнинг хорижий давлатлар билан маданий алоқалар бўйича махсус вакили Алехандро Као де Бенос бу маълумотни рад этган.
КХДР марказий газетаси Rodong Sinmun, шунингдек, мамлакат марказий радиосида эса Ким Чен Иннинг ўлими тўғрисидаги хабарлар фонида унинг номидан баёнот эълон қилинди. Унда Самчжиён шаҳрида сўнгги йилларда олиб борилаётган қурилиш ишларида меҳнат қилаётган ишчиларга миннатдорчилик билдирган. Бироқ баёнот қачон берилгани ва ҳозирда Ким Чен Ин қаерда эканлигига ойдинлик киритилмаган.
Маълумотларга кўра, Шимолий Кореяда 2019 йилдан буён ҳокимиятни топшириш учун фавқулодда режа тайёрланмоқда. Мамлакат тепасига амалдаги раҳбар Ким Чен Иннинг ўрнига унинг синглиси Ким Ё Чжон келиши мумкин.
Изоҳ (0)