Россияда коронавирусга чалинганлар сони 114,4 минг кишига, қурбонлар сони 1169 кишига етди

Россияда ўтган бир суткада коронавирус инфекциясига чалиниш бўйича 7933 та янги ҳолат аниқланди. Мамлакатда касалланганларнинг умумий сони 114,4 минг кишига етди. Бу ҳақда «РБК» хабар берди.

Бир сутка ичида касалликдан вафот этганлар сони 96 кишини ташкил қилган. Мамлакатда COVID-19’дан вафот этганларнинг умумий сони 1169 нафарга етган. 13220 киши касалликдан тузалишга муваффақ бўлган, улардан 1601 киши сўнгги бир суткада соғайган.

Янги ҳолатларнинг энг кўпи ёки 3561 таси Москвада қайд этилган. Шунингдек, Москва вилоятида 797 та, Санкт-Петербургда 349 та, Свердловск вилоятида 232 та, Нижегород вилоятида 179 ва Доғистонда 164 та янги ҳолат рўйхатга олинган.

Россия бўйича COVID-19 билан касалланган беморларнинг 57,3 минг нафари Москва шаҳрида, 12,5 минг нафари Москва вилоятида қайд этилган. Москва вилоятидан кейинги ўринларни Санкт-Петербург (4411 нафар бемор, 33 та ўлим), Нижегород вилояти (2123 нафар бемор, 14 та ўлим), Доғистон (1553 нафар бемор, 12 та ўлим), Мурманск вилояти (1313 нафар бемор, тўртта ўлим) ва Краснодар ўлкаси (1083 нафар бемор, 20 та ўлим) эгаллаб турибди.