Беларусда коронавирусга чалиниш бўйича янги ҳолатлар кўпайишига кўра Европа давлатлари орасида энг юқори кўрсаткич қайд этилмоқда. Бу ҳақда ЖССТнинг Беларусдаги вакили Батир Бердиқличев TUT.BY’га берган интервьюсида айтиб ўтди.
Унинг сўзларига кўра, мамлакатда коронавируснинг тез тарқалишининг асосий сабабларидан бири — бу ижтимоий масофаланиш чораларининг етарли даражада эмаслигида. Уларсиз яқин келажакда эпидемиянинг ривожланишини тўхтатишда бирор-бир ютуққа эришиб бўлмайди.
ЖССТ Беларусга оммавий тадбирларни кечиктиришни, барча иккинчи даражали корхона ва ташкилотлар фаолиятини тўхтатишни, масофавий иш ва масофавий ўқитиш шаклларини жорий қилишни, иш жойларида қатъий санитария талабларини жорий қилишни ва фуқароларнинг кераксиз ҳаракатланишини камайтиришни тавсия қилмоқда.
Беларусда 1 май ҳолатига кўра, коронавирусга чалиниш бўйича 14 917 та ҳолат қайд этилган (шундан 890 таси сўнгги сутка давомида), касалликдан 2 918 киши тузалган, 93 нафари фавот этган.
Мамлакат Соғлиқни сақлаш вазирлиги коронавирус билан боғлиқ вазиятни назорат қилса бўлади, деб ҳисоблайди ва касалланганлар сони ортишини вирусни аниқлаш бўйича тест ўтказиш оширилгани билан изоҳламоқда. Беларусда коронавирусни аниқлаш бўйича 186 262 та тест ўтказилган.
Аввалроқ БМТ вакили ҳам коронавирус авж олаётгани сабабли Беларусь аҳолисини уйда қолишга чақирганди.
Эслатиб ўтамиз, Беларусда кенг қамровли карантин чоралари жорий қилинмаган. Мамлакат чегаралари очиқ, давлат ва хусусий компаниялар иш фаолиятини давом эттирмоқда. Мактаб ўқувчиларига ўқув йилини бевосита ўқув муассасасига борган ҳолда давом эттиришга ҳам рухсат берилган. 9 май куни ўтлазиладиган ҳарбий парадга ҳам тайёргарлик кўриш давом этмоқда.
Изоҳ (0)