Коронавирус пандемияси сабаб кузатилаётган глобал инқироз бутун дунёда иқтисодиётнинг норасмий секторида меҳнат қилувчи тахминан 1,6 миллиард одамнинг даромаддан маҳрум бўлишига олиб келади. Бу ҳақда Халқаро меҳнат ташкилоти (ХМТ) тадқиқотида маълум қилинган.
Экспертларнинг ҳисоб-китобларига кўра, инқирознинг дастлабки ойида бутун дунёда норасмий ишловчилар қатламининг даромадлари 60 фоизга қисқаргани кузатилган. Африка ва Америкада уларнинг даромадлари 81 фоизга қисқарган, Осиё-Тинч океани минтақасида 21,6 фоизга, Европа ҳамда Марказий Осиёда 70 фоизга қисқарган. ХМТ ишчилар ва уларнинг оилалари даромаднинг бошқа манбасини топмаса, яшаб қолишга қийналишини қайд этган.
Мутахассисларнинг тахминига бўйича 1,6 миллиард норасмий иқтисодиётда банд бўлган ишчилар дунё бўйича ишчи кучининг қарийб ярмини ташкил қилади. ХМТнинг қайд этишича, ишчилар фаолиятига давлат томонидан қўлланилган карантин чекловлари ёки улар банд бўлган соҳанинг пандемиядан зарар кўриши салбий таъсир қилган.
Меҳнат статистиклари 15-халқаро конференциясида ҳам норасмий меҳнат сектори вакилларига уй хўжаликлари хусусиятига эга корхоналар деб қараш лозимлигини қайд этган. Жумладан, уларнинг фаолият қамрови кенг эмаслиги, ташкилот обрўси ҳам баланд эмаслиги, ташкилий бозорлар ва кредит ташкилотларидан узоқлиги таъкидланган.
Аввал ХМТ 2020 йилнинг иккинчи чорагида иш вақти 6,7 фоизга камайиши ва бу тўлиқ ставкада ишлайдиган 195 миллион нафар одамнинг (ҳафтасига 48 соат ишлайдиганлар) қисқартирилишини англатишини билдирганди. Турли давлатларда чеклов тартибининг узайтирилиши прогнозни яна ҳам ёмонлаштирди. Энди ХМТ тахмини бўйича иш вақти 10,5 фоизга камаяди, яъни бутун дунёда 305 миллион нафар одам ишсиз қолиши мумкин.
Аввалроқ Россияда коронавирус пандемияси туфайли ишсизлик даражаси 6 миллионга етиши мумкинлиги, 2008—2009 йилларда кузатилган инқирозда ушбу хавфни енгиб ўтишда давлатнинг бизнесни қўллаб-қувватлаши муҳим роль ўйнагани қайд этилганди.
Изоҳ (0)