Европанинг 5 та мамлакатидан бўлган меҳнатга лаёқатли фуқароларнинг 30 миллиондан ортиғи коронавирус пандемияси пайтида пулсиз қолишдан хавотирланиб ёрдам пули сўради, деб хабар бермоқда Financial Times. Улар компенсация тўловларини олиш учун мурожаат қилган.
Дастурга мувофиқ, давлат ходимларнинг иш ҳақини сақлаб қолган ҳолда уларга қисқа муддатли таътил беради. Бу пандемия даврида ишсизлик даражаси кескин ошишининг олдини олиш мақсадида қилинган. Гап иқтисодий ривожланган Германия, Франция, Буюк Британия, Италия ва Испания ҳақида кетмоқда. Уларда меҳнатга лаёқатли фуқароларнинг бешдан бир қисми молиявий ёрдам сўраб мурожаат қилган.
Қайд этилишича, бу энг қиммат дастур бўлиб, прогнозларга кўра, юқоридаги давлатлар умумий ҳисобда 100 миллиард евродан ортиқ маблағ сарфлашига тўғри келади. Бироқ Испания ва Буюк Британия каби давлатлар ишсизликнинг кучайишига йўл қўймаслик учун бундай қўллаб-қувватлаш чоралари узоқ давом этмаслигидан хавотирда. Германиядаги ишчилар эса ҳукумат томонидан бериладиган пулга 2 ойдан ортиқ яшай олмасликларидан қўрқмоқда.
Иқтисодчиларнинг таъкидлашича, бу сафар иқтисодий инқироз аввалги инқирозларга қараганда анча оғир бўлиб, кичик бизнес: ресторанлар, меҳмонхоналар ва дўконлар ишига салбий таъсир кўрсатди. Иш берувчилар шунчаки ходимларни ишдан бўшатиб юбориши ёки ўз бизнесларини ёпиши мумкин.
Испания ҳукумати май ойида коронавирус пандемиясидан кўпроқ зарар кўрган фуқароларга тўланадиган имтиёзлар миқдорини белгилашни режалаштирмоқда. Мамлакат расмийлари буни 500 евро миқдорида белгилашни муҳокама қилмоқда.
Аввалроқ БМТ коронавирус пандемияси сабаб 30 га яқин давлатда очарчилик бўлиши мумкинлигини, барча мамлакатлар ҳукуматини пандемиядан сўнг янги иқтисодиётни яратиш ва иш ўринларини кўпайтиришга чақиргани ҳақида хабар берилган эди.
Изоҳ (0)