22 апрель куни халқаро ташкилотлар вакиллари билан ўтган брифинг чоғида Туркманистон ташқи ишлар вазири Рашид Мередов мамлакат ҳукумати коронавирусга чалинган беморларни яшираётгани тўғрисидаги айбловларни рад этганди. Эртаси куни Жаҳон соғлиқни сақлаш ташкилоти экспертлари мамлакатда ростдан ҳам COVID-19 билан касалланганлар йўқлигига ишонч ҳосил қилиш учун Туркманистонга бориши маълум бўлди. «Хроника Туркманистана» нашри ўзининг манбаларига таяниб маълум қилишича, мамлакатда ЖССТ вакилларининг келиши олдидан беморлар бошқа касалхоналарга яширилиши мумкин.
Маълумотларга кўра, ЖССТ экспертларининг мамлакатга келиши маълум бўлганидан сўнг, Туркманистон Соғлиқни сақлаш вазирлиги, ТИВ, ИИВ, МХВ ҳамда бошқа қатор вазирлик ва қўмиталар, жумладан, минтақавий бўлинмалар вакиллари учрашув ўтказган. Учрашувда Туркманистонни яхши томондан кўрсатиш учун қандай чоралар кўриш лозимлиги муҳокама қилиниб, бир қатор вариантлар кўриб чиқилган:
- Карантин зоналардаги фуқаролар сонини камайтириш, уларнинг аксарият қисмини уй карантинига юбориб, маҳаллий шифокор ва инспекторлар кузатувига олиш;
- Коронавирус ташхиси қўйилган, шунингдек, инфекция белгилари бор беморларни ҳарбий объектлар ҳудудига жойлаштириш, чунки ЖССТ миссиясининг у ерга кириши мумкин эмас. Бироқ бу масаланинг яна бир томони — маҳаллий шифокорларнинг махфий объектларга киришига рухсат беришга тўғри келади;
- ЖССТ вакиллари талаб қиладиган бўлса, бир ёки икки беморни яқиндагина аниқланди, дея кўрсатиш.
Аввалроқ Туркманободда коронавирус билан касалланган камида 7 бемор даволанаётгани ҳақида хабар берилганди. Таъкидланишича, ҳозирда уларнинг икки нафари даволанишга муваффақ бўлган. Қолганларни эса Гарашсизликдаги руҳий касаллар шифохонасига жойлаштириш режалаштирилмоқда.
Шунингдек, ушбу шифохоналарда ЖССТ миссияси Туркманистонда бўлган вақт, яъни 2-3 кун давомида ишловчи тиббиёт ходимларини тайёрлаш бошланган. Туркманободдаги карантин зонасида ишловчи шифокорлар ўз жойида қолиб, улар ЖССТ вакилларига ўз ишлари ҳақида сўзлаб беради.
Мавзуга доир: АҚШ элчихонаси: «Туркманистон мамлакатда коронавирус аниқланганида ҳам уни тан олмаслиги мумкин»
Изоҳ (0)