Туркия меҳмонхоналарида all inclusive ва шведча стол тизими коронавирус пандемияси тугаганидан кейин ҳам сақланиб қолади. Бу ҳақда «РИА Новости»га Туркия Меҳмонхона эгалари федерацияси раҳбари Сурур Чоработир маълум қилган.
Хабарда айтилишича, аввалроқ маҳаллий нашрлардан бири мамлакат Маданият ва туризм вазири Меҳмет Эрсойга таяниб, Туркия меҳмонхоналари ўз мижозларининг эпидемиологик хавфсизлигини қўшимча равишда таъминлаш мақсадида шведча столдан воз кечиши мумкинлигини маълум қилган.
«All inclusive ва шведча столни бекор қилиш ҳақида гап йўқ. Ўтган йилдаёқ сайёҳлик агентликлари билан жорий мавсумда айнан шу хизматларни сотиш бўйича шартномалар тузган бўлсак, улар қандай бекор қилиниши мумкин?», — деган Чорабатир.
Унинг айтишича, ОАВлар Туркия вазирининг санитария чораларини кучайтириш, ижтимоий масофаланишни ошириш ҳамда айрим хизматларни тақдим этиш одатий тартибини ўзгартириш ҳақида борган сўзларини нотўғри талқин қилган.
Туркияда 28 апрель ҳолатига кўра, охирги бир сутка ичида коронавирус инфекциясига чалинганлар сони қарийб 2,4 мингтага кўпайди, мамлакатда COVID-19 билан касалланганларнинг умумий сони 114 мингдан ошган. Туркиянинг 30 та шаҳрида 11 апрелдан бошлаб комендантлик соати жорий этилган.
Изоҳ (0)