Қозоғистонда коронавирусга чалинганлар бир сутка ичида 36 кишига, Қирғизистонда эса 21 кишига кўпайди

Қозоғистонда 29 апрель ҳолатига кўра, коронавирус билан касалланиш бўйича яна 36 та ҳолат қайд этилиб, касалликка чалинганларнинг жами сони 3063 кишига етди, деб хабар беради Tengrinews.

Мамлакатда COVID-19 коронавирус инфекцияси тарқалиши бошланганидан буён 25 киши вирус қурбонига айланган, шунингдек, 774 бемор даволанишга муваффақ бўлган. COVID-19 билан касалланиш бўйича Нур-Султонда — 7 та, Олмаотада эса 5 та янги ҳолат қайд этилган. Оқмўла, Туркистон ва Атирау вилоятларида учтадан янги ҳолат аниқланган бўлиб, Жамбил, Костанай, Манғистов ва Павлодар вилоятларида — 2 нафардан. Ғарбий Қозоғистонда бир кишида коронавирус аниқланган.

Аввалроқ Қозоғистон президенти Қосим-Жўмарт Тўқаев мамлакатда амалда бўлган фавқулодда ҳолат режими 11 майгача узайтирилганини маълум қилганди.

Қирғизистонда 29 апрель ҳолатига кўра, яна 21 кишида COVID-19 аниқланган. Бу ҳақда мамлакат Соғлиқни сақлаш вазирлигига таяниб, «Kloop.kg» хабар берди. Бутун мамлакат бўйлаб коронавирус билан касалланганлар сони 729 кишига етган. Коронавирус билан касалланиш бўйича сўнгги ҳолатлар мамлакатнинг қуйидаги ҳудудларида қайд этилган:

• Бишкек — 13;
• Ўш вилояти — 1;
• Боткент вилояти — 1;
• Норин вилояти — 6 та ҳолат.

Ўтган бир сутка ичида 21 беморга стационардан жавоб берилган. Бутун мамлакат бўйлаб коронавирус пандемияси бошланганидан бери 437 киши даволанди.Ўзбекистонда эса 29 апрель 10:00 ҳолатига кўра, коронавирус инфекциясини юқтириб олиш билан боғлиқ 1955 та ҳолат қайд этилган, 15 мартдан бери беморларнинг саккиз нафари вафот этган. Ҳозирга қадар жами 992 бемор даволанишга муваффақ бўлган.