Хитойда ўтган бир сутка ичида коронавирус билан касалланиш бўйича яна 22 та ҳолат аниқланди, 23 киши тузалди, вафот этганлар қайд этилмади. Бу ҳақда Хитой Соғлиқни сақлаш миллий комиссияси маълумотларига таяниб, «РИА Новости» хабар берди.
Коронавирус пандемияси бошланганидан буён мамлакатда 83 940 киши вирус юқтириб олган, уларнинг 78 422 нафари даволанишга муваффақ бўлган, 4637 нафар бемор вафот этган.
Шунингдек, яна 26 кишида касаллик аломатларсиз кечаётгани аниқланган. Умумий ҳисобда, бундай кишиларнинг яна 993 нафари шифокорлар назоратида бўлиб турибди.
Жанубий Кореяда эса сўнгги сутка ичида коронавирус билан касалланиш бўйича 19 та ҳолат аниқланган, беморларнинг 68 нафари соғайган, 2 нафари вафот этган.
Коронавирус пандемияси бошланганидан буён мамлакатда 10 761 киши вирус юқтириб олган, уларнинг 8 922 нафари даволанишга муваффақ бўлган, 246 нафар бемор вафот этган.
Мамлакатда деярли 1 ҳафтадан буён коронавирусга чалиниш бўйича ҳар куни 10 га яқин ҳолат аниқланмоқда. Фақат 24 апрель куни бу кўрсаткич 6 кишига тенг бўлган.
Қайд этилишича, мамлакатда янги касалланишлар сонининг камайиши сабабли ҳукумат ижтимоий масофаланиш режимини енгиллаштирилган шаклда 5 майгача узайтирди. Истироҳат боғлари ва дам олиш масканлари қайта очиладиган бўлди, спорт, диний ва кўнгилочар муассасаларга ўз фаолиятини чекланган ҳолда давом эттиришга рухсат берилади.
Мамлакатда 15 апрель куни парламент сайловлари бўлиб ўтди. Шу куни сайлов участкаларига бориш учун кўплаб одамлар кўчага чиқди. Карантин идоралари сайловлардан 2 ҳафта ўтиб касалланганлар сони ошиш-ошмаслигини синчковлик билан кузатиб боришини эълон қилди. Аммо ҳозирча касалланганлар сони ошгани кузатилмаяпти.
Изоҳ (0)