Бирлашган Миллатлар Ташкилоти коронавирус пандемиясига қарши курашда давлатларга тўсиқ бўлаётган санкцияларни олиб ташлашга чақиради. Бу ҳақда БМТ бош котиби Антониу Гутерришнинг баёнотига таяниб, «РИА Новости» хабар берди.
«Коронавирус контекстида биз ушбу пандемияга қарши давлатларнинг кўрсатадиган реакциясига зарар етказиши мумкин бўлган барча санкцияларни олиб ташлашга чақирамиз. Мен ўйлайманки, санкциялар режими оқилона бўлиши ва барчамиздаги глобал сиёсат мақсадларига путур етказмаслиги керак», — деди Гутерриш.
Аввалроқ Россия президенти Владимир Путин G20 давлатларига савдо урушлари ва халқаро санкциялардан воз кечишни таклиф қилганди. Европа Иттифоқи коронавирус сабаб Сурия, Венесуэла, Эрон ва КХДРдан санкцияларни олиб ташлашга чақирганди.
Шунингдек, БМТ барча мамлакатлар ҳукуматини пандемиядан сўнг янги иқтисодиётни яратиш ва иш ўринларини кўпайтиришга чақирди.
«Аввалги одатий ҳаёт тарзига қайтиб бўлмайди. Шу ҳафта ва ойларда ҳукуматлар томонидан молиявий манбаларни оммавий равишда қайта тақсимлаш келажакда кутилаётган ўзгаришлар учқунидир», — деб таъкидлаган ташкилот мутахассислари.
Уларнинг прогнозига кўра, пандемия шароитида 2020 йилнинг иккинчи чорагидаёқ 195 миллион киши ишсиз қолади, ишсизлик ва қашшоқлик даражаси юқори бўлиши мумкин. БМТ экспертларининг фикрича, COVID-19 эпидемияси туфайли юзага келган инқироздан кичик ва ўрта корхоналар, қишлоқ хўжалиги ишчилари, ўз-ўзини иш билан таъминлайдиганлар ва меҳнат муҳожирлари кўпроқ жабрланиши мумкин.
Изоҳ (0)