Дмитрий Песков коронавирус бутунлай тугаши прогнозлари бўйича уни чиқарган Сингапурга қўнғироқ қилишни маслаҳат берди

Кремль Россияда коронавирус эпидемияси август ойида тугашини прогноз қилган сингапурлик олимларнинг башоратлари ишончлилигини баҳолашдан бош тортмоқда. «РБК»нинг хабар беришича, бу ҳақда Россия президенти матмуот котиби Дмитрий Песков маълум қилган.

Дмитрий Песковнинг айтишича, эпидемия тугашининг аниқ санасини олдиндан айтиб бўлмайди. «Агар сингапурлик олимларда бу борада бошқача фикр бўлса, уларга қўнғироқ қилиб сўрашни маслаҳат берамиз», — деган у.

Эслатиб ўтамиз, Сингапур Технология ва дизайн университети (SUTD) тадқиқотчилари мавжуд маълумотлар таҳлили асосида дунёда коронавирус тарқалиши билан боғлиқ вазиятлар якунланишига оид мониторинг натижаларини эълон қилганди. Эпидемиологик вазият бўйича ҳисоб-китоблар математик модель асосида яратилган бўлиб, сайтдаги маълумотлар доимий равишда таҳрирлаб борилади.

Ушбу моделга кўра, АҚШда эпидемия 9 сентябрда, Италияда 31 августда, Буюк Британияда 22 августда, Германия ва Францияда 6 ва 9 августда якунланиши мумкин.

Ўзбекистонда эса коронавирус тарқалиши билан боғлиқ вазият шу йилнинг май ойида якун топиши тахмин қилинган.

Аввалроқ Россия коронавирусга чалинганлар сони бўйича Хитойдан ўтиб кетгани, бир суткада 5841 кишида коронавирус аниқланиб, 100 дан ортиқ бемор вафот этгани хабар берилган эди. Россия президенти Владимир Путин келаси ҳафтада мамлакатдаги коронавирус билан боғлиқ вазият юзасидан янги баёнот билан ОАВда чиқиш қилиши мумкин.