Россияда бир суткада 5841 кишида коронавирус аниқланиб, 100 дан ортиқ бемор вафот этди

Россияда сўнгги бир суткада коронавирусдан 108 киши вафот этди, деб хабар бермоқда «РБК» Касалликка қарши кураш бўйича тезкор штабга таяниб. Бу эпидемия бошланганидан буён қурбонлар сони бўйича янги кунлик рекорддир.

Маълум қилинишича, Россияда коронавирусдан вафот этганларнинг умумий сони 972 кишига етган. Бир кунлик ўлимлар сони бўйича аввалги рекорд 28 апрелда қайд этилган бўлиб, ўшанда 72 киши вафот этганди. Коронавирус қурбонлари сони 27 апрель куни 50 тани, 26 апрель куни 66 тани, 25 апрель куни ҳам 66 тани ташкил этган.

Хабарда айтилишича, бир суткада Россиянинг 83 та ҳудудида коронавирус билан касалланиш бўйича 5 841 та янги ҳолат қайд этилган, 1 110 киши тузалган.

Сўнгги маълумотларга кўра, Россияда коронавирусга чалинган беморларнинг умумий сони 99 399 кишидан ошган, 10 286 киши тузалган.

Аввалроқ Россия коронавирусга чалинганлар сони бўйича Хитойдан ўтиб кетгани хабар берилган эди. Россия президенти Владимир Путин келаси ҳафтада мамлакатдаги коронавирус билан боғлиқ вазият юзасидан янги баёнот билан ОАВда чиқиш қилиши мумкин.