Ўзбекистоннинг Гендер тенгликни таъминлаш масалалари бўйича комиссиясининг тавсиясига асосан «Норматив-ҳуқуқий ҳужжатлар ва уларнинг лойиҳаларини гендер-ҳуқуқий экспертизадан ўтказиш тартиби тўғрисида»ги низом Вазирлар Маҳкамасининг қарори билан тасдиқланди.
Унга кўра, жамиятдаги барча соҳаларни тартибга солувчи қонун ва қонуности ҳужжатлар лойиҳалари комиссия тавсиясига асосан гендер-ҳуқуқий экспертизасидан ўтказилади. Гендер тенгликни таъминлаш масалалари бўйича комиссиясининг билдиришича, бундан асосий мақсад ҳужжатларнинг хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш принципларига мувофиқлигини таҳлил қилишдир.
Экспертизадан ўтказиладиган ҳуқуқий ҳужжат лойиҳаси Ўзбекистон Конституцияси, халқаро умумеътироф этилган нормалар ҳамда «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги қонуни ва ушбу йўналишдаги масалаларни тартибга солувчи бошқа қонун ҳужжатларига мувофиқ бўлиши зарур.
Мазкур низом норматив-ҳуқуқий ҳужжатларда жинс бўйича бевосита ва билвосита камситишга йўл қўядиган, гендер тенглигини таъминлашда хотин-қизларнинг ҳуқуқ ва манфаатларига ҳар қандай чекловлар ўрнатиш ва шундай талқин қилиниши мумкин бўлган нормаларга йўл қўймасликка қаратилган.
Эслатиб ўтамиз, шу кунга қадар гендер тафовут кўрсаткичлари келтирилган 150 га яқин мамлакат рўйхатига Ўзбекистон бирор марта ҳам киритилмаган. 2019 йилда Олий Мажлис Сенати томонидан хотин-қизларни ҳар томонлама қўллаб-қувватлашни назарда тутувчи 2 та норматив-ҳуқуқий ҳужжат — «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги ҳамда «Хотин-қизларни тазйиқ ва зўравонликдан ҳимоя қилиш тўғрисида»ги қонунлар маъқулланиб, бу йўналишда мамлакатда жиддий қадамлар ташланганди.
Изоҳ (0)