Сурхондарё вилояти Термиз туманидаги хонадонларнинг бирига кириб қолган камёб олакўзан Термиз ҳайвонот боғига топширилди. Бу ҳақда Экология ва атроф-муҳитни муҳофаза қилиш қўмитаси ахборот хизмати «Дарё»га маълум қилди.
Хабарда айтилишича, Сурхондарё вилояти Экология ва атроф-муҳитни муҳофаза қилиш бошқармасига жорий йилнинг 27 апрель куни Термиз тумани «Қаҳрамон» маҳалласи раиси телефон қилиб, маҳалладаги хонодонлардан бирига антиқа ҳайвон кириб қолганлигини хабар қилган.
Термиз туман инспекцияси инспекторлари томонидан ушбу ноёб ҳайвон Қизил китобга киритилган олакўзан эканлигини аниқланган. Инспекция томонидан олакўзан Сурхондарё вилояти Экология ва атроф-муҳитни муҳофаза қилиш бошқармаси Термиз ҳайвонот боғига топширилган.
Маълумот учун
Олакўзан заиф, қисқариб бораётган; кенг, лекин спорадик тарқалган табиатан кам сонли тур ҳисобланади. Қизилқум чўли, Устюрт ясси текислиги, Мирзачўл ва Қарши чўли, Ғарбий Тянь-шань ва Помир-Олой тоғ тизмаларининг тоғ ёнбағирлари ва юқори камарлари, Сурхондарёнинг қуйи қисмида кенг тарқалган.
Қишлоқ хўжалиги мақсадида ерларнинг жадал ўзлаштирилиши оқибатида тур сони кескин камайган. Мирзачўл, Қарши чўлининг катта қисми ва Туркистон тоғининг ёнбағирларида ушбу тур жониворлар йўқолиб кетган. Ўзбекистондаги тахминан 5 мингта атрофида сақланиб қолган.
Изоҳ (0)