Бухорода Рамазон ойи муносабати билан 1014 та хонадонга 14 турдаги озиқ-овқат маҳсулотлари тарқатилди. Бу ҳақда «Дарё»га Ёшлар иттифоқи вилоят кенгаши раиси Шерзод Тилавов хабар бермоқда.
Ёшлар иттифоқи ташаббуси ҳамда «Саховат ва кўмак» умумхалқ ҳаракати доирасида тарқатилаётган озиқ-овқат маҳсулотлари кам таъминланган, кўп фарзандли, карантин сабаб даромад манбасидан ажралган, ишсиз, ногирон, боқувчисини йўқотган ва якка-ёлғизларга берилган.
«Рамазон ойида амалга оширилаётган эҳсон тадбирида ‘Ёшлар-келажагимиз’ жамғармаси орқали имтиёзли кредитга эга бўлиб, тадбиркорлик фаолиятини йўлга қўйган 200 нафардан ортиқ ёш тадбиркор беминнат ёрдам берди», — деди Шерзод Тилавов.
Ёшлар иттифоқининг 15 нафар кўнгилли ходими томонидан қадоқланиб, махсус жиҳозланган маҳсулотлар 27 апрель куни автомобилларга ортилиб, «Саховат ва кўмак» карвони сифатида туманларга йўл олган.
Қўшимча қилинишича, мингдан ортиқ оилаларга озиқ-овқат маҳсулотларидан ташқари тиббий воситалар ҳам тарқатилган.
Изоҳ (0)