Ҳабиб Нурмагомедов: Доғистонда шифохоналар тўлган, беморлар сони эса ортмоқда

Енгил вазн тоифасида UFC чемпиони Ҳабиб Нурмагомедов Доғистон аҳолисига мурожаат билан чиқди.

Яккакурашчи коронавирус пандемиясига жиддий қарашни ва эҳтиёж бўлмаганда уйдан чиқмасликни тавсия қилди.

«Ушбу муқаддас ойда мени таниган барча доғистонликларга мурожаат қилмоқчиман. Кўпчилик бу бало бизни четлаб ўтишига умид боғлаганди, айримлар юзага келган вазият жиддий эканига ҳали ҳам ишонмаяпти. Бироқ бизнинг шифокорлар маслаҳати ва илтимосига бўлган бепарволигимиз касалликнинг кенг ёйилишига ҳамда шундоқ ҳам қийин бўлган вазиятнинг янада оғирлашишига сабаб бўлди. Натижада шифохоналаримиз касаллар билан тўлган, мутахассис ва дори-дармон етишмаяпти, беморлар сони эса ортмоқда.

Менга ишонинг. Бу касаллик ҳаёт учун хавфли ва биз уни ўзимизда ҳис қиляпмиз. Уйда қолган ҳолда шифокорлар ва касалхоналар ишини енгиллаштирамиз. Балки, вақтида амалга оширилган эҳтиёткорлигимиз кимнингдир ҳаётини сақлаб қолинишига сабаб бўлар. Яқинларингизни асранг, эҳтиёж бўлмаса уларни кўчага чиқарманг.

Яратганнинг ўзи бизни барча касалликлардан асрасин ва дунёдаги ҳамма беморларга шифо берсин», — дея ёзади Нурмагомедов.

https://www.instagram.com/p/B_iIe3UFLbX/