Левандовски, Хамес, Рибери. «Бавария»нинг 2018/19 йилги мавсумдаги энг чиройли голлари (видео)

«Дарё» футбол мухлисларининг талаб ва таклифларини инобатга олган ҳолда турли мусобақаларда урилган энг сара голларни тақдим этиб келмоқда. Ушбу лойиҳанинг навбатдаги сонида «Бавария» клубининг 2018/19 йилги мавсумдаги энг чиройли голлари тақдим этилади. Голлар рейтинги «Бавария» матбуот хизмати талқинига кўра тузиб чиқилган.

10-ўрин. Леон Горетцка | «Майнц»—«Бавария» (1:2)

Горетцка мюнхенликлар учун қийин кечган баҳсда ҳисобни шу тариқа очганди.

9-ўрин. Томас Мюллер | «Штутгарт»—«Бавария» (0:3)

Томас Мюллер мавсум дебютидаги учрашувда ҳисобни йирик кўринишга олиб келганди. Ундан аввал Мюллер ушбу учрашувда битта ассистни ўз ҳисобига ёздириб қўйганди.

8-ўрин. Хамес Родригес | «Бавария»—«Майнц» (4:0)

2018/19 йилги мавсумни «Бавария»да ижарада ўтказган Родригес ушбу ўйинни ўз бенефига айлантирган ва 2016 йилдаги Хамесни эслатиб юборганди. Ўша учрашувда ҳет-трик қайд этган колумбиялик футболчи иккинчи тўпни ўз услубида киритганди.

7-ўрин. Роберт Левандовски | «Боруссия Д»—«Бавария» (3:2)

Роберт Левандовски мазкур баҳсда собиқ жамоаси дарвозасини икки бор ишғол қилади, бироқ мюнхенликлар ҳисобни ушлаб қололмайди. Марко Ройснинг дубли ва Пако Алькасернинг голи дортмундликларга иродали ғалабани тақдим этади.

6-ўрин. Арьен Роббен | «Бавария»—«Байер» (3:1)

Роббен жарима майдонига кириб ажойиб зарбаси билан гол урган ва жамоасининг иродали ғалабасига ҳисса қўшганди.

5-ўрин. Рафинья | «Айнтрахт»—«Бавария» (0:3)

Франк Риберининг дублидан кейин бразилиялик футболчи сўнгги дақиқаларда мана шу «санъат асари»га муаллифлик қилганди.

4-ўрин. Роберт Левандовски | «Бавария»—«Боруссия Д» (5:0)

Меҳмонларнинг ҳимоядаги хатосидан фойдаланган Роберт яна дортмундликлар дарвозасига чиройли тўп киритади. «Бавария» мазкур ўйинда принципиал рақибини тор-мор келтиради ва чемпионлик пойгасида муҳим қадам ташлайди.

3-ўрин. Давид Алаба | «Ганновер»—«Бавария» (0:4)

Алаба ўзининг «пушка» зарбаси билан ўйинни безаганди.

2-ўрин. Роберт Левандовски | «Фрайбург»—«Бавария» (1:1)

Учрашувда тезкор гол ўтказиб юборган Мюнхен клуби 22-дақиқада Левандовскининг шедеври эвазига ҳисобни тенглаштиради.

1-ўрин. Франк Рибери | «Бавария»—«Айнтрахт» (5:1)

Қанотдан жарима майдонига ёриб кирган Рибери дарвозабон устидан оширган ҳолда тўп киритади. Бу франциялик футболчининг «Бавария» сафидаги сўнгги голи бўлиб тарихга кирганди.