Францияда коронавирусни даволашда ревматоид артрит (бўғимлар яллиғланиши)га қарши ишлатиладиган дорилардан фойдаланилгани тўғрисидаги клиник тадқиқот натижалари биринчи бор ижобий чиқди. Бу ҳақда AP-HP француз касалхоналари ташкилотининг сайтида хабар берилди. Бу даволаш муассасаларининг давлат тармоғи бўлиб, у Париж ва унинг яқинидаги шаҳарларда жойлашган 39 касалхонани ўзида бирлаштиради.
Ревматоид артритга қарши дори воситаси COVID-19’нинг хавфли белгилари — гиперцитокинемия ёки «цитокин бўрони»га қарши курашда фойдаланилган. Бу иммун тизимининг реакцияси бўлиб, унинг натижасида инсон организмида тўқималар бузилишни бошлайди.
«COVID-19 пневмонияси билан касалланган беморларда иммунологик келиб чиқадиган ‘цитокин бўрони’ ўткир респиратор етишмовчилигига ва ўлимга олиб келади», — дейилади AP-HP хабарида.
Тиббиёт ходимлари 27 март куни тадқиқотларни бошлаган. Улар коронавирус сабаб юзага келган пневмония белгиларига эга 129 беморни танлаб олган. 64 беморга нисбатан стандарт даволаниш усуллари қўлланилган бўлса, 65 нафарига тоцилизумаб — ревматоид артритни даволашда ишлатиладиган дорилар ҳам берилган.
Тадқиқот бошланганидан 14 кун ўтиб, ўпкани сунъий нафас олдиришга бўлган эҳтиёж ёки ўлим ҳолати тадқиқотнинг муваффақиятсизлигини кўрсатадиган мезон сифатида қабул қилинган. «Тоцилизумаб билан даволанган гуруҳдаги беморларнинг жуда кам қисми сўнгги нуқтага етиб борди», — дейилади ҳисоботда.
Аввалроқ АҚШ президенти Дональд Трамп коронавирусни нур ва дезинфекция воситалари билан даволашни таклиф қилган, шифокорлар эса уни бу йўлдан қайтаргани ҳақида хабар берилганди. Маълумотларга кўра, Трампнинг коронавирусни даволашда безгакка қарши препаратларнинг самарали эканлиги тўғрисидаги сўзларидан сўнг безгакка қарши гидроксихлорохин ва хлорин препаратларига талаб 46 баравар ошиб кетган.
Мавзуга доир:
Изоҳ (0)