Австрияда коронавирус пандемияси туфайли жорий этилган изоляция режими май ойидан бошлаб бекор қилинади. Reuters’нинг хабар беришича, бу ҳақда мамлакат соғлиқни сақлаш вазири Рудольф Аншобер маълум қилди.
Унга кўра, 1 майдан бошлаб аҳолига кўчага чиқиш ва 10 кишидан ошмаган ҳолда гуруҳ бўлиб тўпланишга рухсат берилади. Шу билан бирга, фуқароларга жамоат жойларида 1 метр масофа сақлаш тавсия этилмоқда.
Май ойида, шунингдек, мактаблар ҳам босқичма-босқич очилади, шароит яхши бўлса, ойнинг ўрталарига бориб ресторанлар, барлар, савдо марказлари, сартарошхоналар ва меҳмонхоналар ҳам очилади.
Эслатиб ўтамиз, Австрияда COVID-19 билан касалланиш бўйича илк ҳолат 25 февраль куни қайд этилган бўлиб, ўша вақтдаёқ канцлер Себастьян Курс ҳукумат вирус тарқалишининг олдини олиш бўйича барча чораларни кўришини билдирганди.
16 март куни мамлакатда коронавирус билан касалланиш бўйича 959 та ҳолат қайд этилган. Шундан сўнг бир ҳафтага қаттиқ карантин чоралари жорий этилган. Кейинроқ чекловлар 13 апрелга қадар давом этиши, ҳукумат 14 апрелдан уни секин-аста камайтириб бориши маълум қилинган.
6 апрель куни ҳукумат Австрия жамиятини босқичма-босқич очиш бўйича режани тақдим этган. 14 апрелдан кичик дўконлар, 1 майдан эса қолган барча дўконлар, савдо марказлари ва сартарошхоналар ишга туширилиши маълум қилинган. Шу билан бирга, вазият ёмонлашса, ҳукумат бекор қилинган чекловларни қайта жорий этиши мумкинлиги айтилган.
Жонс Ҳопкинс маълумотларига кўра, айни пайтда мамлакатда 15 272 киши коронавирусга чалинган, улардан 12 580 нафари тузалган, 569 нафари вафот этган.
Аввалроқ ЖССТ раҳбари Тедрос Гебрейесус чеклов чораларини юмшатаётган Европа давлатларини касалланиш ҳолатлари камайишда давом этиши учун COVID-19’ни аниқлаш, тестдан ўтказиш, изоляция қилиш ва ҳар бир алоқаларни кузатишни давом эттиришга чақирган эди.
Изоҳ (0)