АҚШ президенти Дональд Трамп президент сайловлари санасини ўзгартиришни кўриб чиқамаётганини билдирди. Бу ҳақда у Оқ уйда ўтказилган брифинг вақтида маълум қилди, деб хабар беради CNN.
«Мен ҳеч қачон сайловлар санасини ўзгартириш ҳақида ўйлаган эмасман», — дейди Трамп. Унинг сўзларига кўра, сайловлар белгиланган сана — 3 ноябрь — «яхши рақам».
Шунингдек, президентнинг таъкидлашича, унинг мухолифи Жозеф Байден ҳам Трамп сайловларни қолдиришга уриниши ҳақида гапирмаган.
Ўтган ҳафта АҚШ собиқ вице-президенти ва Демократлар партиясидан бўлган номзод Жозеф Байден Трамп қандайдир баҳона билан сайловларни бекор қилишга уринишини маълум қилгани ҳақида хабарлар тарқалганди. Байденнинг айтишича, ноябрь ойида сайловларни қандай қилиб хавфсиз ўтказиш масаласига ойдинлик киритиш лозим, чунки ҳеч ким овоз бериш жараёни сабаб ўз ҳаётини хавф остига қўймаслиги керак.
Аввалроқ Жозеф Байденнинг собиқ ходимаси уни жинсий тегажоғликда айблагани ҳақида хабар берилганди.
Эслатиб ўтамиз, 77 ёшли Жозеф Байден АҚШ президентлигига Демократлар партиясидан ягона номзод саналади. Унинг номзоди 2020 йил август ойида партия сездида расман илгари сурилиши режалаштирилган.
Изоҳ (0)