Жанубий Кореяда сўнгги суткада коронавирус билан касалланиш бўйича 14 та ҳолат аниқланиб, касалланганларнинг умумий сони 10 752 кишига етди, беморларнинг 90 нафари тузалди. Бу ҳақда мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб «РИА Новости» хабар бермоқда.
Қайд этилишича, шу кунгача коронавирусга чалинганларнинг 244 нафари вафот этган, 8 854 нафари тузалган. Камида 268 кишида даволанганидан кейин ҳам организмида вирус қолгани аниқланган. KCDC вируснинг қайта аниқланиш эҳтимолий сабабларини ўрганмоқда.
Мамлакатда янги касалланишлар сонининг камайиши сабабли ҳукумат ижтимоий масофаланиш режимини енгиллаштирилган шаклда 5 майгача узайтирди. Истироҳат боғлари ва дам олиш масканлари қайта очиладиган бўлди, спорт, диний ва кўнгилочар муассасаларга ўз фаолиятини чекланган ҳолда давом эттиришга рухсат берилади.
Эслатиб ўтамиз, Жанубий Кореяда 25 ва 26 апрель кунлари коронавирусга чалинганлар 10 кишига кўпаяётган эди.
Изоҳ (0)