Авиация соҳасидаги пандемик инқироз рақамларда. Қанча учувчи ишсиз қолди?

Коронавирус пандемияси барча соҳалар қаторида авиация соҳасига ҳам жиддий зарба берди. Бутун дунё бўйича барча катта ва кичик авиакомпаниялар пандемия туфайли мислсиз зиён кўрмоқда. Фуқаро авиацияси соҳасида чарх ураётган глобал инқироз ва турғунликнинг яққол манзарасини соҳа мутахассис Денис Кривошеев ўз блогида келтириб ўтди.

Рақамлар ҳақиқатан ҳам ачинарли. Унда айтилишича:

– Virgin авиакомпанияси 3 минг нафар ходимни, хусусан, 600 нафар учувчини ишдан бўшатган;

– Finnair 12 та самолётни қайтармоқда ва 2 400 нафар ходимни ишдан бўшатган;

– Finair эса 22 та самолёт буюртмасини бекор қилган ва 4 100 нафар ходимни ишдан бўшатган;

– Ryanair’нинг 113 самолёти ерда қолмоқда, 900 нафар учувчи аллақачон ишдан бўшатилган ва яна 450 нафар учувчи билан меҳнат шартномаси яқин ойлар ичида тўхтатилади;

– Norvegian Airlines ўзининг барча олис масофага парвозларини тўхтатган ва ижарага олинган 787 самолёти эгасига қайтарилган;

– SАS авиакомпанияси 14 та самолётни қайтариб берган ва 520 нафар учувчи билан хайрлашган;

– Etihad ўзининг 18 дона А350 самолётига берган буюртмасини бекор қилган, 10 дона А380 ва 10 дона Boeing 787 самолётлари ҳозир умуман учмаяпти, 720 нафар ходим ишдан бўшатилган (ҳозирча фақат чет эллик ходимлар билан хайрлашилган);

– Emirates авиакомпаниясининг эса 38 та А380 лайнери ерда қолмоқда; Boeing 777х га тарихан энг катта буюртма деб эътироф этилган 150 дона самолёт буюртмаси бекор қилинди. Ёши 56 дан катта бўлган барча ходимларга ихтиёрий равишда нафақага кетиш таклиф қилинган;

– Wizzair ўзи ижарага олган 32 та А320 самолётини эгасига қайтарган ва 1 200 нафар ходимни, жумладан, 200 та тўлиқ экипажни ишдан бўшатган. Яна 430 нафар ходимни ишдан олиш борасида тайёргарлик кетяпти. Қолган ходимларнинг ҳам иш ҳақи 30 фоизга қисқартирилади.

– Iberiya авиакомпанияси эса 56 та самолётни консервацияга олди;

– British Airways 34 та самолётни консервация қилди ва 58 ёшдан катта ёшли ходимларни нафақага чиқарди;

– Luxair ва Брюссель авиакомпанияси ўз самолёт паркини 50 фоизга ва ходимлар сони ҳам шунга монанд қисқартириляпти;

– Eurowings ўзини банкрот деб эълон қилди;

– Lufthansa икки босқичда жами 72 та самолётни консервация қилмоқчи.

– Aerobus заводларида буюртмаси бекор қилинган 60 та янги самолёт қолиб кетмоқда, прогнозларга кўра, сентябрга бориб учишдан тўхтаган самолётлар сони 8 000 тага етиши мумкин. Бу эса жаҳон бўйлаб 90 мингта учувчи ишсиз қолади демакдир. Муқобил равишда ишсиз қоладиган борт кузатувчилари сони эса 400 мингта бўлади.