Суриянинг Африн шаҳрида портловчи қурилма ўрнатилган бензовознинг портлаб кетиши оқибатида 40 нафар тинч аҳоли ҳалок бўлди. Бу ҳақда Туркия Мудофаа вазирлигига таяниб, Anadolu хабар берди.
Таъкидланишича, ҳалок бўлганлар орасида 11 ёшли бола ҳам бор, яна 47 киши жароҳатланган бўлиб, улар шифохонага етказилган.
Суриянинг SANА агентлиги маълумотларига кўра, портлаш бир неча тинч аҳолининг умрига зомин бўлган. Бундан ташқари, турк ҳарбий хизматчилари ҳам ҳалок бўлган, бироқ уларнинг сонига аниқлик киритилмаган. Шунингдек, турк ҳарбийлари орасида ҳам жароҳат олганлар бор. SANA’нинг маълум қилишича, портлаш шаҳар марказидаги бозорда содир бўлган.
Туркия Мудофаа вазирлиги портлашда Анқара томонидан террорчилик ташкилоти дея аталувчи Курдистон ишчи партиясини айбламоқда.
АҚШ Давлат департаменти Африндаги вазиятни деескалация қилишга чақирди. Давлат котиб Майкл Помпео ўзининг Twitter’даги саҳифасида мазкур портлашни «Африндаги беайб инсонларга қарши содир этилган қўрқоқ террорчилик акти» деб атади.
Мавзуга доир:
Изоҳ (0)