Жаҳон соғлиқни сақлаш ташкилоти бош директори Тедрос Адан Гебрейесус кўплаб давлатларда коронавирус туфайли эълон қилинган карантин сабаб чегараларнинг ёпиб қўйилгани бошқа касалликларни даволашда ишлатиладиган вакциналар танқислигини юзага келтирганини маълум қилди. Бу ҳақда Reuters хабар қилган.
Унинг сўзларига кўра полиомелит, қизамиқ, вабо, одам папилломаси вируси, сариқ иситма касаллиги ва менингитга қарши эмлаш бўйича 14 та кампания вақтинча тўхтатилган. Ушбу вакциналар 13 миллион аҳолига мўлжалланганди.
«Вакциналар ва иммунизация глобал альянси (GAVI) берган маълумотларга кўра, аҳолининг даромади паст бўлган 21 та мамлакат COVID-19 тарқалиши туфайли чегараларнинг ёпилиши ва транспорт юк қатновлари муаммоси юзага келиши оқибатида вакциналар етишмовчилиги кузатилаётганини хабар қилган»,— дея таъкидлаган ЖССТ раҳбари махсус брифингдаги баёнотида.
Гебрейесус Саҳрои Кабирдан жанубда безгак касаллиги тарқалиши билан боғлиқ вазиятдан хавотирда эканини ҳам қайд этган. ЖССТ прогнозларига кўра, касалликдан одамларни эмлаш тўхтатилса, ушбу ҳудудда безгак билан касалланганлар сони икки бараварга кўпайиши мумкин.
Дунёнинг кўплаб мамлакатлари коронавирус пандемияси оқибатида чегараларини ёпган ва халқаро авиақатновларни вақтинча тўхтатган.
Мавзуга доир:
Жонс Ҳопкинс университети берган маълумотларга мувофиқ 27 апрель ҳолатига кўра, бутун дунёда коронавирус инфекцияси билан касалланганлар сони 3 миллиондан ошиб кетган, 878 мингдан зиёд киши касалликдан тузалган. 208 мингдан зиёд одам COVID-19 оқибатида ҳаётдан кўз юмган. АҚШ коронавирус билан касалланган одамлар сони бўйича рейтингда етакчилик қилмоқда.
Изоҳ (0)