Хитой Ташқи ишлар вазирлиги расмий вакили Гэн Шуан Хитой КХДРга коронавирусни аниқлаш бўйича тест тизимларини жўнатганини маълум қилди, бироқ Пекин томонидан Шимолий Кореяга шифокорлар гуруҳи жўнатилгани рост ёки ёлғонлиги ҳақидаги саволга тўғридан-тўғри жавоб бермади. Бу ҳақда «РИА Новости» хабар берди.
«Коронавирус тарқалганидан кейин, билишимча, кўплаб халқаро ташкилотлар, шу жумладан, Қизил Хоч КХДРга эпидемияга қарши кураш воситаларини тақдим этди. Хитой ҳам Шимолий Кореяга фавқулодда зарурат ҳолатида коронавирусни аниқлаш учун қўлланиладиган ташхис воситаларини жўнатди», — дея маълум қилган дипломат.
Унинг қўшимча қилишича, коронавирус дунё бўйлаб тарқалишда давом этаётган айни пайтда Хитой ўз ҳудудида эпидемияга қарши курашмоқда ва бир вақтнинг ўзида ўз имкониятлари даражасида ёрдамга муҳтож бошқа давлатларга ёрдам бермоқда.
«КХДР етакчиси Ким Чен Иннинг саломатлиги ҳақидаги хабарларга келсак, ўтган ҳафтада шунга ўхшаш савол берилган эди, ҳозир ҳам ўшандаги каби жавоб беришим мумкинки, ОАВдаги бунга оид хабарларнинг қандай манбаси борлигини билмайман«, — деди Гэн Шуан.
Унинг айтишича, Хитойнинг КХДРга шифокорлар гуруҳини жўнатгани ҳақидаги савол масаласида у тақдим этиши мумкин бўлган ҳеч қандай маълумот йўқ.
Аввалроқ Reuters агентлиги Хитой ҳукумати соғлиғида муаммо бўлиши мумкин бўлган Шимолий Корея етакчиси Ким Чен Инни тиббий кўрикдан ўтказиш учун Пхеньянга тиббиёт мутахассислари ҳам бўлган махсус делегация юборгани ҳақида хабар берган эди.
CNN телеканали АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Президент Дональд Трамп эса Ким Чен Иннинг соғлиғи ёмонлашгани тўғрисидаги хабарларга жавоб берар экан, CNN’га унчалик ишонмаслигини билдирган.
Маълумотларига кўра, Шимолий Кореяда 2019 йилдан буён ҳокимиятни топшириш учун фавқулодда режа тайёрланмоқда. Мамлакат тепасига амалдаги раҳбар Ким Чен Иннинг ўрнига унинг синглиси Ким Ё Чжон келиши мумкин.
Шунингдек, Жанубий Корея ҳукумати Ким Чен Иннинг тирик ва соппа-соғлигини маълум қилди. Бундан ташқари, Пхеньянда аҳоли ваҳимага тушгани ҳақидаги хабарлар рад этилди.
Изоҳ (0)