Ўзбекистонда 24 апрель, жума куни, коронавирусга чалинган беморларнинг 60 нафари тузалиб, реабилитацияга жўнатилди. Мамлакатда тузалганларнинг умумий сони 621 нафарга етди. Бу ҳақда Соғлиқни сақлаш вазирлиги хабар берди.
Самарқанд вилояти юқумли касалликлар шифохонасида коронавирус инфекциясига чалинган дастлабки 4 нафар бемор буткул соғайди.
Соғайганларнинг барчаси ушбу инфекцияга чалинганлар билан яқин мулоқот орқали касалликни юқтириб олган. Уларнинг 2 нафари катта ёшли эркак, 2 нафари эса вояга етмаган бола, барчаси Самарқанд вилоятидан. Сўнгги текширувлар уларда инфекция йўқлигини кўрсатди.
Шу куннинг ўзида Қашқадарёда 2 киши, Фарғона вилоятида 19 киши (улар орасида уч ойлик чақалоқ ҳам бор), Тошкентда 10 киши, кейинроқ яна 6 киши, Наманганда 14 киши ва Андижонда 5 киши тузалгани ҳақида хабар берилган эди.
Ўзбекистонда 24 апрель соат 23:00 ҳолатига кўра, коронавирус инфекциясини юқтириб олганлар сони 26 кишига ошиб, 1804 нафарни ташкил этмоқда. Шундай қилиб, 24 апрель куни Ўзбекистонда коронавирус инфекциясини юқтириб олиш билан боғлиқ 46 та янги ҳолат тасдиқланди. Мамлакатда 15 мартдан буён коронавирусга чалинган беморларнинг саккиз нафари вафот этди. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.
Изоҳ (0)