Андижон ва Наманган вилоятида 24 апрель, жума куни, жами 19 нафар бемор коронавирусдан буткул соғайди. Бу ҳақда Соғлиқни сақлаш вазирлиги матбуот хизмати хабар бермоқда.
Қайд этилишича, Наманган вилоятидан 14 нафар, Андижон вилоятидан 5 нафар бемор буткул соғайган бўлиб, улар вилоят соғлиқни сақлаш бошқармалари масъуллари иштирокида реабилитацияга кузатилган.
Наманганда соғайганларнинг 4 нафари эркак, 10 нафари аёллар бўлиб, барча Наманган вилоятидан. Андижонда дарддан фориғ бўлганларнинг 5 нафари ҳам аёллар бўлиб, барчаси ушбу вилоятдан. Иккита вилоятдан жами 19 нафар бемор коронавирус инфекциясига чалинганлар билан мулоқот орқали касалликни юқтириб олишган. Улар орасида энг ёши каттаси 79 ёшда бўлса, энг ёши кичиги 20 ёшда.
Шу куннинг ўзида Қашқадарёда икки киши, Фарғона вилоятида 19 киши (улар орасида уч ойлик чақалоқ ҳам бор), Тошкентда 10 киши, кейинроқ яна 6 киши — жами 37 киши коронавирусдан соғайгани маълум қилинган эди.
Шундай қилиб, Ўзбекистон бўйлаб коронавирус инфекциясидан бутунлай соғайган беморлар 617 нафарга етди.
Эслатиб ўтамиз, 24 апрель соат 10:00 ҳолатига кўра, Ўзбекистонда коронавирус инфекциясини юқтириб олиш билан боғлиқ 1778 та ҳолат аниқланган, беморларнинг саккиз нафари вафот этган.
Изоҳ (0)