Тошкент шаҳар Юнусобод туманида яшовчи уч ёшли боланинг ота-онаси илтимосига биноан, шаҳар ички ишлар бош бошқармаси ходимлари болани туғилган куни билан табриклаш учун хизмат машиналарида ташриф буюрди. Бу ҳақда Тошкент шаҳар ИИББ хабар берди.
Маълум қилинишича, фуқаролар мурожаатларини қабул қилиш ва уларга шошилинч ҳолатларда ёрдам кўрсатиш учун ташкил этилган «иссиқ тармоқ» телефон рақамлари орқали кичкинтой Бахтиёрнинг қариндошлари мурожаат қилиб, уни туғилган куни билан табриклашни илтимос қилган. «Полиция машиналарини жудаям яхши кўради, агар унинг уч ёшга тўлгани билан Тошкент шаҳар ИИББ ходимлари табрикласа, жудаям хурсанд бўларди» — дея мурожаат қилган боланинг онаси.
Тошкент шаҳар ИИББ Хавфсиз туризмни таъминлаш бошқармаси ходимлари ушбу илтимосни рад эта олмади. Юнусобод туманининг айнан ўша мавзесида ёрдамга муҳтож фуқаролар ҳам турполиция ходимларини кутаётганди. ИИББ ходимлари ана шу вазиятдан фойдаланиб, уч ёшга тўлган болакайни хизмат машиналари сиреналарини ёққан ҳолда табриклашга келган.
Аввалроқ Тошкентда туғруқхонага боришга улгурмаган аёл ППХ машинасида фарзандини дунёга келтиргани ҳақида хабар берилганди.
Изоҳ (0)