Спиртли ичимлик ичиб, уйида жанжал кўтарган ва кўчага чиқиб карантин қоидаларини бузган самарқандлик фуқаро 15 суткага қамалди, дея хабар беради «Дарё» мухбири.
Таъкидланишича, 2020 йилнинг 21 апрель куни соат 19:30 да булунғурлик фуқаро И.А. яшаш хонадонида спиртли ичимлик истеъмол қилиб, маст бўлиб қолган ва уйида жанжал кўтарган. Бундан қўрқиб кетган қизи Э.С. профилактика инспекторини чақирган. Профилактика инспекторининг келишини эшитган И.А. эса кўчага қочиб чиққан.
Маст ҳолда карантин қоидаларига зид равишда кўчада ниқобсиз юрган И.А. профилактика инспектори томонидан топилиб, сўроқ қилинганида ИИБ ходимларига қаршилик кўрсатиб, бақир-чақир қилиб жанжал кўтарган.
Булунғур туман маъмурий судининг маълум қилишича, И.А. илгари ҳам шундай ҳуқуқбузарликларни содир қилгани учун жазоланган. Аммо тегишли хулоса чиқармаган.
Суд ҳукмига кўра, И.А. Маъмурий жавобгарлик тўғрисидаги кодекснинг 54-моддаси 1-қисми (Эпидемияларга қарши кураш қоидаларини бузиш), 183-моддаси (Майда безорилик) ва 194-моддаси 1- қисми (Ички ишлар органлари ходимининг қонуний талабларини бажармаслик) билан айбли деб топилган ва 15 суткага қамалган.
Шунингдек, Самарқанд шаҳрида карантинда рухсатномасиз автомобиль бошқарган ва ЙПХ инспекторидан қочган ҳайдовчи қилмиши учун 10 суткага қамалди.
Аниқланишича, 2020 йилнинг 21 апрель куни Самарқанд шаҳри Ибн Сино кўчасида ўтказилган рейд тадбирида фуқаро Н.А. бошқарувидаги Spark тўхтатилганда ҳайдовчида карантин пайтида автомашина бошқариш учун махсус рухсатномаси йўқлиги маълум бўлган.
Ҳайдовчи мазкур ҳолат ҳақида маъмурий баённома тузмоқчи бўлган ЙПХ инспектори ва давлат санитария-эпидемиологик осойишталик маркази ходимининг қонуний талабларини бажармасдан, уларга қаршилик кўрсатиб, машинасида қочиб кетган.
Самарқанд шаҳар маъмурий суди раиси Ориф Пардаевнинг «Дарё»га маълум қилишича, ҳуқуқбузар ҳайдовчи Н.А.га Маъмурий жавобгарлик тўғрисидаги кодекснинг 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш) ва 194-моддаси 1-қисми (Ички ишлар органлари ходимининг қонуний талабларини бажармаслик) билан 10 сутка маъмурий қамоқ жазоси тайинланган.
Фуқаронинг карантин қоидаларига риоя этмагани юзасидан Самарқанд шаҳар ДСЭОМ томонидан суриштирув ишлари олиб борилмоқда.
Изоҳ (0)