Андижонда Агросаноат мажмуи устидан назорат қилиш инспекцияси Асака тумани бўлими бошлиғи 44 гектар ерни олиб қўймаслик учун 10 минг АҚШ доллари талаб қилиб, пора олаётган вақтида қўлга тушди. Бу ҳақда Бош прокуратура матбуот хизмати хабар берган.
Хабарга кўра Бош прокуратура ҳузуридаги департаментнинг Андижон вилояти бошқармаси ҳамда ДХХ вилоят бошқармаси ходимлари билан ўтказилган тезкор тадбирда тадбиркорлик субъектларини ҳуқуқларини ҳимоя қилиш борасида «Қ.Э.» фермер хўжалиги иш юритувчиси Х.Х.нинг аризасига асосан Агросаноат мажмуи устидан назорат қилиш инспекцияси Асака тумани бўлими бошлиғи вазифасини бажарувчи Б.М. аризачи Х.Х.дан таъмагирлик йўли орқали 10 минг АҚШ доллари талаб қилиб, пулларни Агроинспекциянинг маъмурий биноси ёнида воситачи орқали олган вақтида ашёвий далиллар билан ушланган.
Маълум бўлишича, Б.М. фермер хўжалигига тегишли бўлган 44 гектар ер майдонида қишлоқ хўжалиги маҳсулотлари тўлиқ экилмаганлигини рўкач қилиб, ерни олиб қўйиш билан қўрқитган.
Мазкур ҳолат юзасидан Б.М.га нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари олиб борилмоқда.
Изоҳ (0)