Қашқадарёда карантин қоидаларини бузиб, Қизил китобга киритилган балиқларни овлаган фуқаролар қўлга олинди. Бу ҳақда «Дарё»га вилоят экология ва атроф-муҳитни муҳофаза қилиш бошқармаси матбуот хизмати маълум қилмоқда.
Таъкидланишича, жорий йилнинг 20 апрель куни Яккабоғ туманининг тоғли ҳудудларида браконерларга қарши курашиш мақсадида рейд тадбири ўтказилган.
Тадбирда бошқарма ходимлари «Қизилдарё»да балиқ овлаётган икки нафар шахсни учратган.
Туманнинг Сувлисой қишлоғида яшовчи Нодир Ашуров ва ўзини таништиришни истамаган яна бир фуқаро балиқ овлаш тақиқланган пайтда тартибни бузиб, Қизил китобга киритилган Амударё гулбалиғини овлаётгани маълум бўлган. Ҳамда ов қуроли ва 4 дона балиқ ашёвий далил сифатида олинган.
Ҳозирда фуқаролар қилмишини прокуратура ўрганмоқда.
Маълумот учун, 2009 йилда чоп этилган Қизил китобга балиқларнинг 17 тури киритилган. Улар орасида Амударё гулбалиғи ҳам бор.
Изоҳ (0)