Тошкент вилояти Чирчиқ шаҳрида яшовчи фуқаро икки кун давомида уйидан чиқмаган. Қўшниларнинг саъй-ҳаракати билан бу фуқаро ўз уйидан ҳушсиз ҳолда топилган. Бу ҳақда Фавқулодда вазиятлар вазирлиги хабар берди.
Маълум қилинишича, 2020 йилнинг 23 апрель куни тахминан соат 15:30 да Тошкент вилоят Фавқулодда вазиятлар бошқармасининг навбатчилик қисмига Чирчиқ шаҳар, 1-кичик туман, 33-уйда истиқомат қилувчи фуқаролар ушбу уйнинг 29-хонадон эгаси М.П. икки кун давомида кўринмай қолганлигидан хавотирланиб, ёрдам сўраб мурожаат қилган.
Мазкур чақирув юзасидан бошқарманинг ёнғин-қутқарув гуруҳи қисқа вақт ичида белгиланган манзилга етиб бориб, махсус асбоб-анжомлар ёрдамида хонадоннинг темир эшигини очган. Шундан сўнг М.П. уйнинг меҳмонхонасида ҳушсиз ҳолатда эканлиги аниқланган.
Қутқарувчиларнинг тезкорлик билан кўрган чоралари натижасида фуқарога биринчи тиббий ёрдам кўрсатилиб, шифохонага етказилган. Ҳозирда унинг аҳволи яхши.
Аввалроқ Қашқадарё вилояти фавқулодда вазиятлар бошқармаси Деҳқонобод туманида яшовчи ҳомиладор аёл ҳамда кўричак билан оғриган беморни вертолётда шифохонага олиб борганди, вертолётда туғруқхонага олиб борилган ҳомиладор аёл ўғил фарзандли бўлган эди.
Изоҳ (0)