Халқ таълими вазири Шерзод Шерматов «Доимий прописка қилиш ҳамда турган жойи бўйича ҳисобга олиш тартибини ислоҳ қилиш чора-тадбирлари тўғрисида»ги Президент фармони имзолангунга қадар 6 мингдан ортиқ педагог ходимлар пропискадан ўтолмай йиллар давомида қийналиб келганини маълум қилди. Бу ҳақда у ўзининг Telegram’даги саҳифасида ёзиб қолдирди.
«Тўғриси, ўзим Тошкентда туғилиб ўсганим учун прописка деган масалага аввал унчалик эътибор қилмасдим. Лекин Халқ таълими вазирлигига ўтганимда прописка бўйича юзлаб мурожаатларни кўрдим, бироқ раҳбар сифатида уларга ёрдам бера олмасликни бошдан ўтказдим ва бу масала ушбу соҳа ходимлари учун қанчалик зарур эканини ҳис қилишга тўғри келган пайтлар бўлган», — дейди вазир ўз баёнотида.
Унинг таъкидлашича, мактаблардаги ойликлар йиллар давомида паст бўлгани сабабли тошкентликлар орасида мактабга ишга кириб ишлашни хоҳловчилар ҳам унчалик кўп бўлмаган. Бундай шароитда ишлаш учун эса кўпгина мактаблар бошқа ҳудудлардан келган ходимларнигина ишга таклиф қила олган.
«Лекин, шу оғир меҳнатига қарамай, прописка деган расмиятчиликни деб, улар ўз уйи бўлса ҳам унга қонуний эгалик қила олмаган. Мана, Президентнинг ушбу фармони билан барча давлат ташкилотларида 5 йил ишлаб келган ходимлар учун прописка муаммоси ҳал бўлди. Шунинг учун бу фармондан сон жиҳатдан энг кўп хурсанд бўлганлар, айнан халқ таълими соҳасидагилар бўлса керак деб ўйлайман», — дея ўз сўзларини якунлаган Шерзод Шерматов.
Эслатиб ўтамиз, Шавкат Мирзиёев Тошкент шаҳри ва вилоятига доимий прописка қилишни соддалаштириш ҳақидаги фармонни 21 апрель куни имзолади. Фармонда Тошкент шаҳри ва вилоятида жойлашган давлат органлари ва ташкилотларида 5 йил муддат мобайнида узлуксиз меҳнат фаолиятини юритаётган мутахассисларни (техник, хизмат кўрсатувчи ва ишлаб чиқариш ходимларидан ташқари) мазкур ҳудудларда доимий яшаш жойи бўйича рўйхатга олиш белгиланган.
Изоҳ (0)