Олий Мажлис Сенати раиси Танзила Норбоева 22—23 апрель кунлари Қорақалпоғистон Республикаси Жўқорғи Кенгеси қўмиталари, Хоразм, Бухоро, Навоий, Андижон, Наманган ва Фарғона вилоятлари халқ депутатлари вилоятлар Кенгашлари раислари ва сенаторлар билан видеомулоқот ўтказди. Бу ҳақда Сенат ахборот хизмати хабар берди.
Қайд этилишича, мулоқотда коронавирус пандемияси оқибатларини бартараф этиш, озиқ-овқат хавфсизлигини таъминлаш ва аҳоли томорқаларидан самарали фойдаланишни ташкил этиш борасида халқ депутатлари маҳаллий Кенгашлари томонидан амалга оширилаётган ишлар муҳокама этилди.
Видеомулоқотда бугунги оғир кунларда туман, шаҳарларда ишсиз қолган ва эҳтиёжманд аҳолининг рўйхатларини шакллантириш ҳамда уларни «Саховат ва кўмак» умумхалқ ҳаракати доирасида бандлигини таъминлаш, моддий қўллаб-қувватлаш масаласи ҳам муҳокама қилинди. Ушбу жараёнларда фаол иштирок этган тадбиркорларга давлат томонидан имтиёзлар берилишини ташкил этиш борасида маҳаллий Кенгаш депутатларининг вазифалари батафсил тушунтирилди.
Шунингдек, Ўзбекистон Президенти раислигида 22 апрель куни ўтказилган видеоселектор йиғилишида билдирилган фикрлардан келиб, ўзини ўзи банд қилган фуқароларни қўллаб-қувватлаш, уларнинг қонуний фаолият юритиши учун қулай ва содда ҳуқуқий тизим яратиш, ёшлар ва аёлларга ҳунар ўргатиш ишларини янада кенгайтиришда маҳаллий Кенгаш депутатлари фаол бўлиши кераклиги қайд этилди.
Бундан ташқари, «намунали кенгашлар» фаолиятини ташкил этиш бўйича олиб борилаётган ишлар ҳолати ва маҳаллий Кенгашлар депутатлари ҳамда ҳудуддаги сенаторлар томонидан аҳоли мурожаатларини ҳал этиш борасида кўрилаётган чоралар таҳлил қилиниб, маҳаллий Кенгаш депутатларига тегишли тавсиялар берилди.
Эслатиб ўтамиз, Танзила Норбоева Россиядаги ўзбекистонлик мигрантлар масаласида россиялик ҳамкасби Валентина Матвиенкодан ёрдам сўраганди. Россия президенти Владимир Путин 18 апрель куни меҳнат муҳожирларининг иш патенти муддатини 15 июнгача узайтириш тўғрисидаги фармонни имзолади.
Изоҳ (0)