Тошкентда лицензиясиз «Тропикамид» ва «Селофен» сотаётган дорихоналар фош этилди

Тошкентнинг Чилонзор туманида ДХХ ва ИИВ ходимлари ҳамкорлигида ўтказилган тезкор тадбир давомида Euro Med Farm компаниясига қарашли дорихонада кучли таъсир қилувчи дори воситаларининг ноқонуний савдоси йўлга қўйилганлиги фош этилган.

Дорихона кўздан кечирилганда 364 дона «Регапен», 85 дона «Селофен» ва 13 дона «Тропикамид» дори воситалари ноқонуний сақланаётганлиги аниқланган. Дорихона раҳбари Ў.А.нинг машинасидан 1610 дона «Регапен», 200 дона «Селофен» ва 399 дона «Тропикамид» топилган.

Суриштирувлар жараёнида ушбу ноқонуний ишлар занжири фуқаро А.Б.га бориб тақалди. У томонидан Чилонзордаги хонадонга 7600 дона «Тропикамид» дори воситаси яшириб қўйилгани аниқланган. Шунингдек, А.Б. ушбу дори воситаларини П.М. исмли шахсга ҳам етказиб турган.

Натижада Чилонзорнинг 1-мавзесида жойлашган П.М.га тегишли Arrakasta Group дорихонасида 100 дона «Тропикамид» дори воситаси қонунга хилоф равишда сақланаётганлиги аниқланган.

Бундан ташқари, Учтепа туманида жойлашган Kamola-Xur Invest компаниясига қарашли дорихона раҳбари П.Б. махсус лицензияга эга бўлмаса-да, мижозга бир дона «Селофен» капсуласини 20 минг сўмга сотаётган вақтида ашёвий далил билан ушланган.

Дорихона кўздан кечирилганда 3139 дона «Селофен» ва 923 дона «Регапен» борлиги аниқланган. Умуман, ўтказилган тадбирлар натижасида жами 2897 дона «Регапен», 3425 дона «Селофен» ва 8112 дона «Тропикамид» дори воситалари мусодара қилинган.