«Ўзгидромет» хабарига кўра, Ўзбекистон ҳудудининг катта қисмида 24 апрель, жума куни, об-ҳаво қуруқ ва илиқ бўлди. Кундузи ҳарорат 28-30, жанубда эса 32-34 даражагача исиди.
Фақат республиканинг шимолий туманларига ғарбий Қозоқистондан кам нам ва нисбатан салқин ҳаво кириши давом этади. Қорақалпоғистонда ва Хоразм вилоятида айрим жойларга ёмғир ёғади, шамолнинг тезлиги секундига 15-20 метргача кучайиши мумкин. Ҳарорат 17-20 даражагача пасаяди.
Кечга яқин республиканинг жануби—ғарбий туманларига Туркманистондан нам ҳаво оқим киришни бошлайди, 25 апрель, шанба куни эса нам ҳаво оқими деярли бутун мамлакат ҳудудига тарқалади. Барча вилоятларда ҳаво булутли бўлади, 24 апрель куни кечаси Бухоро, Навоий вилоятларида, шанба куни кундузи Тошкент, Самарқанд, Жиззах, Сирдарё вилоятларида, республика шимоли ва жанубида асосан кучсиз ёмғир ёғади.
Момақалдироқ бўлиши ва шамолнинг тезлиги 15-20 метр/секундгача кучайиши мумкин. Кундузги ҳарорат 22-25 даражагача пасаяди.
Таъкидланишича, ҳар доим баҳорда кузатилганидек, об-ҳавонинг бундай ўзгариши қисқа муддатли бўлади, 26 апрель, якшанба куни ҳаво яна очилади, ёғингарчиликсиз ва кам булутли бўлади. Ҳарорат тез кўтарилиб, кундузи 27-30 даражага етади.
27 апрель, душанба куни ҳам республика ҳудудида об-ҳаво худди шундай кам булутли ва қуруқ бўлади. Ҳарорат кўтарилиши давом этади, душанба куни ҳаво ҳарорати кундузи 32-34 даражани, жанубда 35-37 даражани ташкил қилади.
«Ўзгидромет» энг иссиқ йилларда апрель ойида ҳарорат 35-37, жанубий ҳудудларда эса 37-39 даражани ташкил қилганини эслатиб ўтган.
Изоҳ (0)