АҚШ Хитойни коронавирус билан илк касалланиш ҳолати ҳақидаги маълумотларни ошкор қилишга чақирди

Американинг The Washington Post газетаси коронавирусга чалиниш бўйича дастлабки ҳолат ҳақида яна турли назариялар тарқалишининг олдини олиш мақсадида Хитой ҳукуматини биринчи одам касалланиши шарт-шароитлари тўғрисидаги маълумотларни ошкор қилишга чақирди.

Нашрнинг таъкидлашича, коронавирус Ухандаги лабораторияда гўёки атайлаб яратилгани тўғрисидаги тарқалаётган хабарлар фонида Хитой ўз манфаати ва бутун дунё манфаати йўлида эпидемия айнан қандай бошлангани борасида яхшилаб текширув ўтказиши лозим. Бунда уни имкон қадар ошкора, натижаларини эса ишончлироқ қилиш мақсадида чет эллик мутахассисларни ҳам жалб этиш лозим.

Жонс Ҳопкинс университетининг соғлиқни сақлаш бўйича хавфсизлик маркази директори Том Инглесбининг сўзларига кўра, хитойлик мутахассислар яқинда ушбу соҳада олиб борган тадқиқотларини батафсил баён қилишлари, мамлакат расмийлари эса ушбу ҳужжатларга кириш имкониятини очишлари керак. «Ушбу пандемия қандай бошланганини тушуниш жуда муҳим», — деб таъкидлаган у.

The Washington Post нашрига кўра, дунёдаги аксарият олимлар, шунингдек, АҚШ ва Буюк Британия ҳукуматлари қошидаги таҳлилчилар коронавирус лабораторияда махсус ишлаб чиқарилган деган назарияларга ишонқирамай қарамоқда, аммо Хитойнинг амалдаги сиёсати шундай фикрлар келиб чиқишига туртки бўлмоқда.

Эслатиб ўтамиз, январь ойи охирида АҚШ республикачи-сенатори Том Коттон коронавируснинг сунъий равишда яратилганини тахмин қилган ва Хитойда ягона 4-даражадаги, дунё бўйича энг хавфли патоген миркоорганизмлар устида ишловчи суперлаборатория мавжудлигини билдирганди.

Бундан ташқари, Fox News телеканали ҳам коронавируснинг Уханда лаборатор шароитда яратилганини тахмин қилган. Телеканал коронавируснинг кутилмаганда институт ходимларидан бири тасодифан инфекцияни юқтириб олиши оқибатида тарқалиб кетган бўлиши мумкинлиги ҳақидаги гипотезани илгари сурган.

Нобель мукофоти соҳиби Люк Монтанье ҳам вируснинг Ухандаги лабораторияда ишлаб чиқилгани ҳақида фикр билдирган.

Хитой Ташқи ишлар вазирлиги вакили Чжао Лицзян эса ушбу тахминларга жавобан Жаҳон соғлиқни сақлаш ташкилоти коронавируснинг сунъий синтез оқибатида пайдо бўлганлигини тасдиқламаганини қайд этган. Ухань вирусология институти раҳбари Юань Чжимин бугунги кун олимлари янги турдаги коронавирусдек вирусни сунъий тарзда яратиш учун етарли билимга эга эмас, деб айтган.

Жаҳон соғлиқни сақлаш ташкилоти эса коронавирус келиб чиқиши ҳайвонларга бориб тақалади, деб ҳисобламоқда. АҚШ разведкаси ҳам коронавируснинг сунъий яратилганини тасдиқловчи далилларни топмаган.

Жонс Ҳопкинс университети маълумотларига кўра, дунё бўйича коронавирусга чалинганлар сони 2 миллион 745 мингдан, вафот этганлар эса 193 минг кишидан ошиб кетди.