Москвадаги барча тиббиёт ходимлари коронавирусга қарши антитанага эга эканликларини билиш учун экспресс-тест топширади. Бу ҳақда Москва вице-мэри Анастасия Раковага таяниб, «РБК» хабар берди.
Таъкидланишича, тест нафақат касалларни қабул қилиш учун мўлжалланган касалхона ва стационарларда ишловчи ходимлардан, балки бошқа шифохона ва поликлиника шифокорларидан ҳам олинади.
«Биз шаҳар касалхоналарида синовдан ўтиб, яхши натижа кўрсатган икки турдаги экспресс-тестлардан фойдаланамиз», — дейди Ракова.
Вице-мэрнинг аниқлик киритишича, тест учун материал сифатида бармоқдан оз миқдорда қон намунаси олинади. «Экспресс-тестлар қонда вирус борлигини аниқламайди, улар инсоннинг нафақат касал эканлигини, балки олдин ҳам касал бўлган ёки бўлмагани, унда инфекцияга қарши антитана пайдо бўлганини билдирувчи иммуноглобулинни аниқлайди», — дейди Ракова.
Сўнгги маълумотларга кўра, Россияда коронавирус билан касалланганлар сони 68 мингдан, вирус қурбонлари сони эса 600 дан ошган.
Мавзуга доир: Россияда COVID-19 ташхисини қўювчи 17 та тест давлат рўйхатидан ўтказилгани маълум қилинди
Эслатиб ўтамиз, янги эълон қилинган карантин тартибига мувофиқ, нодавлат тиббиёт ташкилотларига барча талабларга риоя қилган ҳолда ҳудудий санитария-эпидемиологик осойишталик марказлари раҳбарлари томонидан имзоланадиган шартнома асосида 2020 йил 1 сентябрга қадар коронавирус инфекциясини лаборатор текшириш бўйича пуллик тиббий хизмат кўрсатишларига рухсат берилган эди.
Изоҳ (0)