Трамп коронавирусни нур ва дезинфекция воситалари билан даволашни таклиф қилди. Шифокорлар уни бу йўлдан қайтарди

АҚШ президенти Дональд Трамп 23 апрель, пайшанба куни, Оқ уйда бўлиб ўтган брифингда қуёш нури одамларни коронавирус билан даволашда ишлатилиши мумкин, деб хато тахмин қилди. Бу ҳақда CNN хабар бермоқда.

Брифингда миллий хавфсизлик вазирлиги вакили Билл Брайан коронавируснинг қуёш нури ва иссиқлик таъсирида заифлашиши кўрсатилган тадқиқот натижаларини тақдим этган. Шундан сўнг Дональд Трамп COVID-19 касаллигига чалинган америкаликлар иссиқ кунларда қуёш нури орқали даволаниши мумкин, деб тахмин қилган.

Президент Оқ уйнинг коронавирусга қарши кураш бўйича координатори доктор Дебора Бирксдан шифокорлар билан гаплашиб, даволаниш учун ёруғлик ва иссиқликдан фойдаланган ҳолда касалликни даволаш усули бор-йўқлигини аниқлашни сўраган. Шифокор унга ёруғлик ва иссиқлик даволанишда фойдаланилмаётганини айтган. Трампнинг фикрича, даволашда ультрабинафша ёки шунчаки кучлироқ нурдан фойдаланиш мумкин.

Брифингда, шунингдек, дезинфекциялаш воситалари, масалан, оқартирувчи восита ёки изопропилли спирт вирусни тезда йўқ қилиши кўрсатилган бошқа тадқиқот натижалари ҳам тақдим этилган. Бунга жавобан Трамп ушбу воситалардан, масалан, инъекция кўринишида коронавирусни даволашда фойдаланиш мумкинлигини текшириб кўришни таклиф қилган. Унинг фикрича, дезинфекция воситалари вирусни бир дақиқада йўқ қилиши мумкин.

Бир неча шифокорлар CNN’га қуёш нури коронавирус учун даволаш воситаси бўлолмаслигини билдирган. Шифокорлар Трампнинг қуёш ва дезинфекцияш воситалари билан даволаниш ҳақидаги таклифлари мантиққа тўғри келмаслиги ҳақида огоҳлантирган. Қуёш нурида даволанишга уриниш куйиш, тери саратони ёки бошқа салбий оқибатларга олиб келиши мумкин.

Жаҳон соғлиқни сақлаш ташкилоти COVID-19’ни қуёш билан даволашни ҳақиқатдан йироқ деб айган, қуёш ёки 25 даража иссиқ ҳаво коронавирус тарқалишининг олдини олмаслигини таъкидлаганди. Мутахассислар ҳам ўз навбатида ультрабинафша лампалар, агар ундан тўғри фойдаланилмаса, одам саломатлигига зарар етказиши мумкинлигидан огоҳлантирган.

АҚШ озиқ-овқат маҳсулотлари ва санитар назорат бошқармаси раҳбари Стивен Хан Трампнинг чиқишидан сўнг фуқароларни дезинфекция воситаларини ичиб юрмасликка чақирган, Вашингтон ҳукумати ҳам одамлардан дезинфекция воситалари билан ўзларига инъекция қилиб юрмасликни сўраган.

Жонс Ҳопкинс маълумотларига кўра, АҚШда коронавирусга чалинганлар сони 869 минг кишидан ошиб кетди, 80 миндан ортиқ бемор тузалган, қарийб 50 мингга яқини вафот этган.