Чехия ҳукумати ўз фуқароларига 24 апрелдан чет элга чиқишга, шу жумладан бошқа мамлакатларга дам олиш учун боришга рухсат берди. Шу кундан бошлаб мамлакат бўйлаб эркин ҳаракатланишга қўйилган тақиқ бекор қилинди. Prague Morning’нинг хабар беришича, бу ҳақда Чехия соғлиқни сақлаш вазири Адам Войтех маълум қилган.
Бундан ташқари, талабалар ва иш визаси билан келганлар Чехияга кира олиши учун чет элликларни мамлакатга киритмаслик бўйича чеклов чоралари юмшатилди. Чехия ва чет эл фуқаролари мамлакатга кираётганда коронавирусга тест салбий чиққанини кўрсатувчи таҳлилни тақдим этиши ёки 14 кун карантинда ўтириши керак. Бунда тақдим этилаётган тест топширилганига 4 кундан ошмаган бўлиши лозим.
Бундан ташқари, фуқароларга 10 кишигача тўпланишга рухсат берилди (бундан аввал фақат 2 киши тўпланиши мумкин бўлган).
Ҳукумат, шунингдек, 27 апрелдан бошлаб ОТМларда дарсларни давом эттиришга, кутубхона ва дўконларни очишга рухсат беради. Эпидемия ҳолати яхшиланса 11 майдан савдо марказлари, музейлар, гўзаллик салонлари, яна 2 ҳафтдан кейин эса меҳмонхоналар ва ресторанлар ўз ишини давом эттиради.
Агар коронавирус билан боғлиқ вазият ёмонлашса, чекловларни юмшатиш бекор қилинади.
Чехия коронавирус эпидемияси туфайли Европа давлатлари ичида биринчилардан бўлиб ўз чегаларини ёпган. Кириш-чиқишга чекловлар 16 мартдан бошлаб амалга киритилганди.
Сўнгги маълумотларга кўра, мамлакатда 7 187 кишида коронавирус қайд этилган. Улардан 2 152 нафари тузалган, 210 нафари вафот этган.
20 апрель куни Чехия президенти Милош Земан маҳаллий радиостанциялардан бирига берган интервьюсида коронавирус қайтадан авж олмаслиги учун фуқароларнинг чет элга чиқишига тақиқни яна бир йилга узайтириш лозимлигини айтганди.
Изоҳ (0)