Ижтимоий тармоқларда Андижон вилоятида биолог ва шифокорлардан иборат бир гуруҳ ёшлар коронавирусга қарши дори ўйлаб топгани ҳақида хабарлар тарқалди. Санитария-эпидемиология назорати давлат инспекцияси бошлиғи Нурмат Отабеков ушбу хабарларга муносабат билдирди.
Унинг айтишича, коронавирус инфекциясини даволаш бўйича дори воситалари бугунги кунда кўплаб нуфузли илмий муассасалар олимлари томонидан ўрганилмоқда. Ҳозирги пайтда тиббиёт амалиётида касаллик қўзғатувчисига қарши айнан қайси дорини қўллаш самара бериши ҳақида расмий маълумотлар мавжуд эмас.
«Коронавируснинг (COVID-19) штамми билан чақирилган касалликни даволашда дунё ҳамжамиятида нимаики илғор усул бўлса, у Ўзбекистон амалиётида қўлланилмоқда. Натижаларга эътибор берайлик, Ўзбекистонда шу пайтгача қайд этилган беморларнинг 26,2 фоизи соғайиб реабилитация марказларига ўтказилди. Дунёда бу кўрсаткич 24,3 фоизни ташкил қиляпди. Уларнинг 56,671 (3,4 фоизи) оғир аҳволда қолмоқда», — деб Нурмат Отабековнинг АОКА ҳузурида ташкил этилган штабда айтган сўзларини келтирмоқда «Дарё» мухбири.
Давлат бош санитария инспекторининг таъкидлашича, Ўзбекистонда ушбу касалликга қарши дори ишлаб чиқиш борасида ҳар қандай ҳаракатлар ва интилишларни 100 фоиз қўллаб-қувватлайди, бу каби ташаббусларнинг тарафдори. Бироқ дори ишлаб чиқиш бу ўта қийин ва кўп харажатли жараён.
«Битта нарсани аниқ билиб олишимиз керак бўлади, касалликнинг клиник белгилари намоён бўлишини камайтирган, йўқотган, юмшатган нарсанинг ҳаммаси ҳам дори бўлавермайди. Дори касаллик қўзғатувчисига (вирус, замбуруғ, микроорганизмлар ва бошқалар) таъсир қилиб уни ўлдириши керак. Бунинг учун вирус, замбуруғ ёки микробни тоза ҳолда ажратиб олиб, яратилган дори воситасининг унга бевосита таъсирини, қайси механизмлар ишга тушиши орқали у нобуд бўлишини кузатиш ва исботлаш керак.
Бир нарсани аниқ айтиб қўяй, энг замонавий асбоб-анжомлари, аппаратуралари бор бўлган жуда кўп давлатлар, шу жумладан, Ўзбекистон ҳам ҳали бу вирусни тоза ҳолда ажратиб олмаган. Лаборатория текширувларида эса вирус антигени борлиги аниқланиб, касаллик тасдиқланади», — деган у.
Аввалроқ Нурмат Отабеков коронавирус юқиш хавфи кимларга ва қаерда кўпроқ эканлигини айтиб, фақат кескин чораларгина касаллик чўққисини енгиб ўтишга ёрдам беришини таъкидлаганди.
Изоҳ (0)