Украинада коронавирусга чалинган беморнинг касалхонада даволаниши нархи кунига 11 доллардан 370 долларгача бориши мумкин. Бу ҳақда мамлакат соғлиқни сақлаш вазири ўринбосари Ирина Микичак маълум қилди.
Вазир ўринбосарининг сўзларига кўра, даволаш нархи беморнинг ҳолатига, касаллик шаклига, шифокор томонидан танланадиган даволаш усулига боғлиқ.
Унинг қўшимча қилишича, даволаш ишлари ҳукумат томонидан ажратиладиган тиббий субвенция ҳисобидан амалга оширилади, апрель ойидан бошлаб даволаш ишлари Украина Миллий хизматининг тиббий кафолатлар дастури ҳисобидан молиялаштирилади.
Сўнгги маълумотларга кўра, Украинада коронавирусга чалинган 5710 нафар бемор қайд этилган, касалликдан 359 киши тузалган, 151 киши вафот этган.
Аввалроқ Украина президенти Владимир Зеленский мамлакатнинг «омон қолиш» режимига ўтишини эълон қилган эди. Шунингдек, Зеленский Украинада коронавирусга қарши вакцинани яратган одамга камида 1 миллион доллар мукофот беришини ваъда қилган.
Изоҳ (0)