21 апрель Тошкент вақти билан 23:40 ҳоларига кўра, нефть бозорида WTI маркасидаги нефтнинг яқин орадаги фьючерсининг қиймати -315,87 фоизга тушиб кетди, яъни баррель учун минус 39,44 АҚШ долларига баҳоланди. Бу ҳақда Лондон биржаси ICE’даги савдолар ҳақидаги маълумотга асосланиб, «РБК» хабар берди.
Россиялик эксперт, Москвадаги «Сколкова» бошқарув мактабининг энергетика маркази вакили Екатерина Грушевенконинг сўзларига кўра, бу молия бозорида ҳали умуман кузатилмаган ҳолатдир.
«Бозорлардаги нефть сақлаш жойлари тўлиб кетмаган ва бунга шароит ҳам бўлмаганди. Нима учун бундай ҳолатда савдоларнинг тўхтатилмаганини суриштириш лозим. Ташқи бозорда нефтни зарарга пуллаш ҳолати кузатилмаса керак», — деган россиялик иқтисодчи.
WTI нефтини июнь ойида етказиб бериш нархи ҳам Лондондаги ICE биржасида 1 фоизга, яъни баррель учун 21,1 долларга пастлайди. Муддати узоқроқ даврга етказиб бериш бўйича шартномалар карантин чекловларининг олиб ташланиши ва соҳада нефтга бўлган талабнинг қайта тикланишига умид борлиги сабаб ҳозирча имзоланмаяпти, дея хабар қилган Financial Times.
Бутун дунёда коронавирус тарқалгани туфайли иқтисодиётда қўлланилган катта чекловлар сабаб нефтнинг нархи кескин тушиб кетган. Нефть котировкаларининг қулаши ишлаб чиқариш ҳажмини 10 фоизга камайтириш бўйича ОПЕК+ келишуви имзоланганига қарамай ўзгаришсиз қолди. Келишув иштирокчилари «қора олтин» ишлаб чиқариш ҳажмини 2022 йил апрелигача, яъни нархлар барқарорлашмагунига қадар камайтиришга рози бўлган. Келишув май ойидан кучга киради.
Telegram’даги Бакиро каналида эълон қилинган постда эса ушбу вазиятга шундай изоҳ берилган:
Нефтьнинг WTI нави айни дамда спот ва май ойи фьючерслари учун шаклланган салбий нархларини тушунмаётганлар учун икки оғиз.Каналда ишлаб чиқарувчиларнинг харидорлар учун тўлашга рози бўлаётганининг сабаби ҳам тушунтирилган.Манфий нарх — бу ишлаб чиқарувчилар сотиб олувчиларга қазилган нефтни олиб кетишгани учун тўланадиган комиссия. Нега? Чунки Шимолий Америка бозори учун характерли WTI нефти учун сақлагани жойнинг ўзи қолмаган, омборлар тўлиб бўлган ва танкерлар банд.
Сабаб оддий. Мақсад — харидорларни ушлаб қолиш. Айни дамда битимлар етказиб бериш билан боғлиқ эмас, аксар битимлар етказиб бериш ҳуқуқи холос.Яна бир сабаб насосларни тўхтатиб, қудуқларни ҳозир ёпиб, қайта очиш ўта мураккаб ва қиммат жараёнлиги билан боғлиқ. Битта қудуқни резервацияга ўтказиш ва қайта очиш шартли равишда 2 миллион АҚШ долларига тушади. Қудуқни яна 1 ой ишлатиш ва харидорларга комиссия тўлаш эса 1 миллион долларга айланади. Ҳаммасига яна нисбий афзаллик сабабчи.
Изоҳ (0)