Март ойида МДҲ давлатларидан Россияга пул ўтказмалари январь ойига нисбатан 47 фоизга ошди. Бу ҳақда «Юнистрим» пул ўтказмалари тизимига таяниб, «Известия» хабар берди.
Маълумотларга кўра, Россияга пул ўтказмалари орасида Арманистон, Қозоғистон ва Тожикистон етакчилик қилмоқда. Россияга пул ўтказмаларининг ошиши хорижда қолиб кетган қариндошларини қўллаб-қувватлаш сабаб бўлаётгани билан боғланмоқда.
Ўз навбатида Россияда хориж давлатларига пул ўтказмалари йил бошидан буён 11 фоизга камайган.
«Чет элга ўтказилган транзакциялар одатдаги даврга нисбатан ўртача 30 фоизга камаяди — бу пандемия сабаб чегараларнинг ёпилиши ҳамда ўрта, кичик ва микробизнеслар фаолиятининг чекланиши фонида рўй бермоқда. Меҳнат муҳожирларининг маоши камайиб кетди, қариндошларига кўп пул юбора олмаяпти, айримлар эса умуман ишсиз қолди», — дейди «Фридом Финанс» банки бошқарув раиси Геннадий Салич.
2019 йил давомида Россиядаги жисмоний шахслар томонидан Тожикистонга 2 миллиард 576 миллион доллар пул ўтказилган. Бу республиканинг ўтган йилги ЯИМининг қарийб 33 фоизини ташкил этади. Шу билан бирга, Тожикистондан Россияга жисмоний шахслар томонидан 105 миллион доллар жўнатилган.
Россия миллий тўловлар кенгаши раҳбари Алма Обаеванинг маълум қилишича, коронавирус тарқалиши туфайли келгуси ойларда Россиядан меҳнат муҳожирлари томонидан юбориладиган пул оқими янада камаяди.
«Финам» таҳлилчиси Алексей Коренев ҳам апрель ойида пул ўтказмалари карантин чекловлари сабаб янада тушиб кетишини билдирди. Экспертнинг сўзларига кўра, трансчегаравий ўтказмалар тўғридан-тўғри Россия иқтисодиётига таъсир кўрсатмайди, бироқ яқин хорижий давлатлардаги вазиятни мураккаблаштиради.
Таъкидланишича, февраль ойидан апрелга қадар меҳнат муҳожирлари учун одатда иш мавсуми бошланади — айнан ушбу давр оралиғида кўпчилик пул топиш мақсадида Россияга келади. Пандемия уларнинг режаларини жиддий ўзгартириб юборган ва ўтказмаларнинг камайиши мазкур вазиятга боғлиқ.
Россия Марказий банки статистикасига кўра, 2019 йил давомида мамлакатдаги жами пул ўтказмаларининг 6 миллиард доллари МДҲ давлатларига ўтказилган. Ўтказмаларнинг қарийб ярми Ўзбекистон ҳисобига (3 миллиард доллар) тўғри келмоқда. Ундан кейин ўринларни Тожикистон (669 миллион доллар), Арманистон (627,6 миллион доллар) ва Қирғизистон (612 миллион доллар) эгаллаган.
Изоҳ (0)